![](/static/articles/56/41/l-M9Zv1k1RZv.jpg)
Լուկաշինի կաղամբի հարցը հասավ նախագահին
Արմավիրի մարզի Լուկաշին համայնքի կաղամբի հարցը հասել է հանրապետության նախագահին: Լուկաշինի գյուղապետ Փանոս Խորոզյանի ասելով՝ իրենց գյուղը համարվում է Հայաստանում կաղամբի «շտեմարանը», սակայն գյուղացիներն այս տարի կրակն են ընկել իրենց մշակած կաղամբի ձեռքը:
Նախորդ տարիներին գյուղացիները կաղամբը կիլոգրամը 30 դրամով հանձնել են ՄԱՊ, Արտաշատի պահածոների և մի շարք այլ գործարանների, և գոհ են մնացել: Այս տարի գործարանները կաղամբի մթերման պայմանագրեր չեն կնքել գյուղացիների հետ՝ պատճառաբանելով, թե իրենք նախկինում կաղամբն ընդունել են պաշտպանության նախարարության պատվերով, իսկ այս տարի ՊՆ-ի հետ նման պայմանագիր չունեն:
Եթե անցյալ տարի Լուկաշինում ստացվել է 2000 տոննա կաղամբ, ապա այս տարի սպասվում է կրկնակի՝ 4000 տոննայից ավելի բերք: Գյուղապետ Փանոս Խորոզյանն ասում է, որ Հայաստանի գրեթե բոլոր մարզերում արդեն կաղամբ են մշակում, և լուկաշինցու շուկան փոքրացել է, ուստի նա չի կարող միայն իր ուժերով իրացնել 4000 տոննա կաղամբը:
«Այստեղ կառավարությանն աջակցությունն է պետք: Մարզպետն ասաց, որ խնդրի մասին տեղյակ է պահվել նաև հանրապետության նախագահին: Իսկ եթե հարցը չլուծվի, հրապարակավ ասում եմ՝ գյուղնախարարն իմ ձեռքից չի պրծնի: Միայն խոսելով չի, հայտարարում է, թե գյուղացին թող արտադրի, մնացածն իր գործը չի: Հիմա գյուղացին արտադրել է ու ի՞նչ պիտի անի այդ արտադրանքը»,- ավելացրեց Փ. Խորոզյանը:
Նոյեմբերի կեսերից արդեն կսկսվի կաղամբի համատարած բերքահավաքը: Մինչ այդ գյուղացիները պատասխանի են սպասում նախագահականից:
Մեկնաբանել