Այսօր «Հետքը» նամակ է ստացել Հայաստան ներկրվող չինական հագուստի ապրանքաշրջանառության ոլորտում առկա ապօրինությունների վերաբերյալ: «Հետքը» պատրաստ է հրապարակել նաև հակառակ տեսակետը՝ նամակում արծարծված խնդրի վերաբերյալ: Ստորև ներկայացվում է խմբագրություն ուղարկված նամակն ամբողջությամբ և առանց որևէ խմբագրման:

««Հագուստի աշխարհ» ցանցի խանութները մայրաքաղաքում աճում են սնկի պես: Եվ ինչն է տարօրինակ՝ չինական, մեղմ ասած ցածրաճաշակ ու ցածրորակ ապրանքը, որ այստեղ ներկայացվում է ու մեծ մասամբ գոհացնում է սոցիալական դժվարություններով ապրող մարդկանց, դժվար թե կարողանար գոհացնել, ասենք, Կենտրոնի բնակիչներին: Բայց «Հագուստի աշխարհ» բացվեց նաև կենտրոնական Ամիրյան փողոցում, ընդ որում՝ դրա համար այստեղից վռնդվեց տեղական սուպերմարկետների հսկաներից մեկը՝ «Սթարը»: Սա էլ հետաքրքրություն շարժեց՝ ո՞վ է կանգնած այս ամենի ետևում:

Պարզեցինք «Չիմեգ» ՍՊԸ-ի գոյությունը, որն ապահովում է Հայաստան ներկրվող չինական ապրանքների հիմնական ծավալը: Ներկրման հետ կապված ողջ գործընթացն էլ ղեկավարվում է ՊԵԿ նախագահ Գագիկ Խաչատրյանի որդու ու նրա ընկեր ոմն Անդրանիկի կողմից: Դրա արդյունքում Հայաստան հասնող չինական ապրանքների գրեթե ամբողջ ծավալը՝ 80%-ից ավելին, անկախ նրանից, թե ով է ներմուծում, սահմանին փաստաթղթերով ամրագրվում է հենց «Չիմեգ» ՍՊԸ-ին:

Մեր աղբյուրի փոխանցմամբ, այդ ապրանքաշրջանառությունը, սակայն, հարկային դաշտում չի երևում, ինչը թույլ է տալիս ոչ միայն ահռելի գումարներ խնայել, այլև ներկրված ապրանքը շուկայում ներկայացնել նմանատիպ ցածր գներով, որոնք էլ առկա են «Հագուստի աշխարհ»-ում: Մինչդեռ մյուս տնտեսվարողները, որ նման сделка-ի չեն գնում ու «չինական պապկայով» չեն անցնում, ստիպված են լինում հարկեր վճարել ու ապրանքն էլ, ըստ այդմ, թանկ վաճառել:

Հանցավոր այս խմբավորումը, ըստ մոտավոր հաշվարկների, «չինական պապկայի» արդյունավետ գործունեության շնորհիվ տևական ժամանակ է գերշահույթ է ապահովում՝ մասնավորապես Գ.Խաչատրյանի ընտանիքին: Ավելի կոնկրետ՝ հարկեր թաքցնելն ու չինական ապրանքներն իրենցով անելը Խաչատրյանին տարեկան ավելի քան 50 մլն դոլարի կարգի եկամուտ է ապահովում:

Իսկ սա այն գումարն է, որ ցանկացած հնարավորություն ընձեռում է: Օրինակ՝ որպեսզի նշված անձանցից ամենքն ունենա սեփական բնակարան 300-400 քմ տարածքով Երևանի հենց սրտում, Հյուսիսային պողոտայի Stefano Ricchi խանութի շենքում, իսկ անձամբ ՊԵԿ նախագահը՝ երևանյան բոլոր «էլիտար» նորակառույցներում:

Հարց է ծագում՝ արդյո՞ք այս ամենից տեղյակ չէ նախագահ Սերժ Սարգսյանը»: