Տեսանյութեր
Լուսանկարներ
«Քոռ մկրատը», քաղաքապետի եղբոր օբյեկտն ու «Գյումրու օր» տոնակատարությունների շարքը
Վստահաբար կարելի է ասել, որ Գյումրու օրն այլեւս չի հավակնում ժողովրդական տոնախմբության վերածվելու: Բնակիչները տոն կոչվածին առնչվում են միայն երեկոյան հրապարակում կազմակերպված համերգին իրենց մասնակցությունը ապահովելով: Քաղաքն ապրում է իր սովորական կյանքով մինչեւ այն պահը, երբ մայրաքաղաքից ժամանում են քաղաքապետի կողմից հրավիրված բարձրաստիճան հյուրերը: Այս տարի էլ բացառություն չէր, կարելի է ասել, նախորդ տարվա սցենարի կրկնությունն էր:
Փոխվարչապետ Արմեն Գեւորգյանի եւ Աժ նախագահ Հովիկ Աբրահամյանի գլխավորած պատվիրակությունը նախ եղավ «Գլենդել Հիլզի» կողմից կառուցվող թաղամասում, հետո «քաղաքի տոն» հասկացության հետ ոչ մի կապ չունեցող «Շիրակ» գերեզմանատանը:
Պարզվում է` քաղաքապետը, առիթից օգտվելով, ցանկացել էր բարձրաստիճան հյուրերին ցույց տալ գյումրեցի զոհված ազատամարտիկների վերակառուցված պանթեոնը, որի աշխատանքներին անմիջական աջակցություն էր ցուցաբերել:
Հյուրերի հաջորդ կանգառը քաղաքապետի եղբոր օբյեկտում էր: Սայաթ-Նովա փողոցի մանկական զբոսայգու սկզբնամասում վեր հառնած երկհարկանի շինությունը կառուցումից հետո բավական երկար ժամանակ չէր գործում: Պատուհաններին փակցված «Տրվում է վարձով» հայտարությունը 2-3 ամիս առաջ հանվեց, ու շատ շուտով Գեւորգ Ղուկասյանին պատկանող այդ կառույցում սկսեց գործել «Հրաշքների աշխարհ» զվարճանքների սրահը:
Կարմիր ժապավենը մեծ դժվարությամբ կտրեց Գյումրու քաղաքապետը, հետն էլ չմոռանալով դժգոհել, թե «էս քոռ մկրատն ուրդից են բերել»: Սրահի ներսում արդեն պրն Ղուկասյանը ներկաներին տեղեկացրեց, որ սրահից կարող են օգտվել ոչ միայն փոքրահասակաները, այլեւ մեծահասակաները` առաջարկելով ԱԺ նախագահ Հովիկ Աբրահամյանին խաղային սարքերից մեկի մոտ փորձել դիպուկահարի իր ունակությունները:
Հրաշքներն ու մի բաժակ կոնյակը վայելելուց հետո, հյուրերը ոտքով ուղեւորվեցին «Կինո հոկտեմբեր» կինոթատրոնի շենք: Ավադույթն այս անգամ էլ չխախտվեց, եւ մի քանի ընտրյալներ` դերասանուհի Ժենյա Ավետիսյանը, նկարիչ Վալմարը, թեթեւ ատլետիկայի Եվրոպայի ռեկորդակիր Ռոբերտ Էմմյանը, երգիչ Ալիկ Գյունաշյանը պարգեւատրվեցին Ավետիկ Իսահակյանի պատկերով Վարպետի ոսկյա կրծքանշանով եւ Գյումրու զինանշան հուշամեդալով:
Մեկնաբանություններ (4)
Մեկնաբանել