Հայաստանի Հանրապետության արդարադատության նախարարության քրեակատարողական վարչության նախաձեռնությամբ այլընտրանքային պատիժների կատարման բաժնում հաշվառված թվով 23 անչափահաս դատապարտյալ այսօր այցելել են Ծիծեռնակաբերդ` հարգանքի տուրք մատուցելու Մեծ Եղեռնի զոհերի հիշատակին:

Ծաղիկներ դնելով զոհերի հուշակոթողին` անչափահասներն այցելել են Հայոց ցեղասպանության թանգարան-ինստիտուտ, շրջել թանգարանի սրահներով, ուշադրությամբ դիտել ցուցադրված նկարները, Եղեռնի մասին պատմող տեսանյութերը:

Ինչպես հայտնում է Քրեակատարողական վարչության հասարակայնության հետ կապերի բաժանմունքի պետ Արսեն Բաբայանը, անչափահասները մեծ հետաքրքրությամբ ունկնդրել են թանգարան-ինստիտուտի աշխատակցի ամփոփ մեկնաբանությունները հայ ժողովրդի պատմության ամենածանր էջերի մասին:

Ճանաչողական այցից հետո անչափահաս դատապարտյալները թողել են իրենց գրառումները Հայոց Ցեղասպանության թանգարան-ինստիտուտի  հուշամատյանում` անկեղծ հույս հայտնելով, որ այլևս նման ոճիր չի կրկնվի աշխարհի որևէ երկրում: