Այսօր 25-ամյա Արա Թադեւոսյանի նշանադրության եւ նրանց նորակառույց տան բացման արարողությունը պետք է տեղի ունենար: Արդեն պատվիրել էին տան կահույքը, նույնիսկ տոնական միջոցառման համար խմիչքի հարցն էր լուծված, որ ամբողջ գյուղով քեֆ անեին: Արան ծնողների ու 22-ամյա եղբոր՝ Արկադիի հետ ապրում էր Գեղարքունիքի մարզի Ակունք գյուղում:

Հոկտեմբերի 18-ին երկու եղբայրներով ուրախ տրամադրությամբ հորաքրոջ ամուսնու հետ գնացել են Մարտունի՝ մյուս հորաքրոջ դստեր ծնունդը նշելու: Սովորաբար Արարն ու Արկադին տանից դուրս գալուց առաջ երբեք մորը չեն ասել` «մամ, չե՞ս գալիս մեզ հաջող անես»: Այդ օրը տանից դուրս գալուց առաջ երկու եղբայրն էլ մորը՝ տիկին Զոյային, այդ խոսքերն են ասել:

Մայրը չի քնել մինչ որդիների վերադարձը, սակայն նրան ժամեր անց տեղեկացրել են, որ տուն գալու ճանապարհին իր երկու որդիներն էլ ավտովթարի զոհ են դարձել Մարտունի-Վարդենիս ավտոճանապարհի 21-րդ կմ-ում:

Դեպքը տեղի է ունեցել հոկտեմբերի 19-ին` ժամը 00.20 րոպեին: Այդ օրը մահացել էր 5 մարդ, այդ թվում՝ երիտասարդ տղաների հորաքրոջ ամուսինը:

Այժմ Ակունքի գյուղապետը գյուղում մեկշաբաթյա սուգ է հայտարարել: Ակունքում չի հնչելու բարձր երաժշտություն, հարսանիքներ ու ծնունդներ չեն նշվելու՝ ի հիշատակ զոհված երկու եղբայրների: Իսկ նրանց հուղարկավորության արարողությունը գյուղի երիտասարդները միաժամանակ վերածել են «ամուսնական արարողության»:

Մոտ 20-ից ավելի «Նիվա» մակնիշի սպիտակ ավտոմեքենաներ են հավաքվել Արայի ու Արկադիի տան մոտ: Բոլորն էլ զարդարված են եղել ծաղկեպսակներով, իսկ Արայի նկարը, որպես ամուսնանալ ցանկացողի, վերցված է եղել սիրտ-ծաղկեպսակի մեջ:

Նրանց հարազատներն ասում են, որ Երեւան-Սեւան, Մարտունի-Վարդենիս ավտոճանապարհներին գրեթե ամեն օր են վթարներ լինում, ինչը նշանակում է, որ ճանապարհային ոստիկանները հավուր պատշաճի ուշադրություն չեն դարձնում ճանապարհի այդ հատվածին: