Վոլոդյա Հովսեփյան

Այսօր Լոռու մարզի Դսեղ գյուղում տեղի ունեցավ «Թումանյանական օր» միջոցառումը՝ նվիրված բանաստեղծի 145-ամյակին: Միջոցառումն ունի ավանդական բնույթ և անց է կացվում ամեն տարի աշնանը՝ Հովհաննես Թումանյանի ծննդավայրում:

Այս տարի ևս հյուրեր կային ինչպես մարզից, այնպես էլ մայրաքաղաքից: «Թումանյանն է, որ ձևակերպեց մեր հոգևոր հայրենիքը, ձևակերպեց, թե ինչով պետք է ապրի, առաջնորդվի հայ մարդը, բացեց մեր կենսունակության խորհուրդները»,-նշեց Երևանի Ե. Չարենցի անվան Գրականության և արվեստի թանգարանի տնօրեն Կարո Վարդանյանը:

Երկրորդ տարին է՝ «Թումանյանական օր» միջոցառումը նշանավորվում է  Թումանյանի ժառանգների հիշատակը հավերժացնող հուշաքարերի բացմամբ: Նախորդ տարի գյուղի կենտրոնում բացվեց Թումանյանի Արտավազդ որդու հուշաքարը, այս տարի՝ Ստալինյան բռնություններին զոհ գնացած մյուս երեք որդիների՝ Մուշեղի, Համլիկի և Արեգի հուշաքարերը, ներկաներին հյուրասիրվեց մատաղ: Ինչպես ամեն տարի, այս տարի ևս իրենց ելույթներով հանդես եկան մարզից և մայրաքաղաքից ժամանած տարբեր երաժիշտ-կատարողներ:

Հյուրերն իրենց մտահոգությունը հայտնեցին՝ նշելով, որ, ի տարբերություն նախորդ տարիների, այս տարի ներկաների թիվը նվազել է: Գրողների միության Լոռու մարզային բաժանմունքի նախագահ Մանվել Միկոյանը կարծում է,  որ  պատճառը կազմակերպչական թերացումներն են: «Պետք է շատ մանրակրկիտ պատրաստվել նման միջոցառումներին, որպեսզի սխալ տպավորություն չստեղծվի, որ գրականության մեծերից մեկի՝ Թումանյանի նկատմամբ անտարբերություն կա մեր ժողովրդի կողմից: Թումանյանը սիրված է ոչ միայն հայաստանցիների, այլև հայության կողմից»,-նշեց է Միկոյանն ու հավելեց, որ արտասահմանյան երկրներում իրենց գրականության մեծերին նվիրված միջոցառումներն օրեր են տևում:

«Առաջին հերթին ամեն քաղաքացի ինքը պիտի մտածի՝ այս ձևով ճի՞շտ է մեծարելը կամ սխալ: Եթե մենք քիչ ենք եկել այստեղ որպես լոռեցիներ կամ ՀՀ քաղաքացիներ, ո՞ւմ ենք մեղադրում, որ Թումանյանին վատ  են մեծարում, ամեն մեկս մի մեծարող ենք: Շատ գայինք՝ շատ մեծարեինք, այլ բաներ մտածեինք անեինք»,- ասաց ԱԺ պատգամավոր, ծնունդով լոռեցի Էդմոն Մարուքյանը: Նա նշեց, որ  այս տարվա ընթացքում Թումանյանի 145-ամյակին նվիրված բազմաթիվ միջոցառումներ են եղել:

Դսեղի գյուղապետ Նորիկ Քոչարյանի խոսքով՝ նախորդ տարիներին այս միջոցառմանը ներկա են եղել բարձրաստիճան պաշտոնյաներ, մշակութային շատուշատ գործիչներ, սակայն «Թումանյանական օրն» այս տարի համընկել է Էրեբունի-Երևան տոնակատարության և մի շարք այլ միջոցառումների հետ, ինչի պատճառով դրսից ժամանած հյուրերի թիվը մեծ չէ, իսկ դսեղցիների մի մասն էլ սարերում են: