«Ֆիլոքսենոս պոլսկա սպոլկա» լիազորված ընկերության նախագահ Ռոբերտ Դիլեվսկու գլխավորած պատվիրակությունը հետաքրքրված է Երևանում «Հիլթոն» ապրանքանիշը ներկայացնող, միջազգային չափանիշներին համապատասխան հյուրանոցային համալիրի կառուցման հարցով: Այս մասին հայտնել է պատվիրակությունն այսօր՝ Երևանի քաղաքապետ Կարեն Կարապետյանի հետ հանդիպման ժամանակ:

Կարևորելով մայրաքաղաքում զբոսաշրջության զարգացումը՝ քաղաքապետը ողջունել է «Հիլտոն» հյուրանոցային բրենդի հնարավոր ներկայությունը Երևանում: «Բարձրորակ ծառայություններն ապահովում են զբոսաշրջության համար համապատասխան միջավայր: Մենք շահագրգռված ենք ներդրումային առաջարկով: Վստահ եմ, որ «Հիլթոն» ապրանքանիշը ներկայացված կլինի Երևանում, և պատրաստ ենք քննարկել փոխշահավետ գործակցության առաջարկներ»,- նշել է Կարեն Կարապետյանը:

Երևանի քաղաքապետարանի տեղեկատվության և հասարակայնության հետ կապերի վարչության հաղորդմամբ՝ հյուրերը քաղաքապետին են ներկայացրել աշխարհի տասնյակ երկրներում ներկայացված «Հիլթոն» հյուրանոցային ցանցի զարգացման ծրագրերն ու մատուցվող ծառայությունների փաթեթը: