Լոռու մարզի Վահագնաձոր գյուղի մանկապարտեզը 2010 թ. 11,8 մլն դրամ ներդրումային գումարով հիմնանորոգել եւ գույքով ապահովել են «Շեն» եւ «Օրանժ Տելեկոմ» կազմակերպությունները, սակայն մանկապարտեզը աղքատ գյուղի երեխաների համար մնում է երազանք, քանի որ համայնքի 5 մլն դրամ եկամուտ ապահովող բյուջեից համայնքապետ Էդիկ Եղոյանը չի կարողանում մանկապարտեզին գումար տրամադրել:

Այս տարվա հունիսի 7-ին մանկապարտեզը շահագործելու նպատակով համայնքապետը Կառավարությունից 2,8 մլն դրամ աջակցություն է խնդրել, որին ի պատասխան` համայնքապետին խորհուրդ է տրվել նախադպրոցական հիմնարկի պահպանությունը լուծել համայնքի բյուջեի միջոցներով կամ բարերարների օգնությամբ: Էդիկ Եղոյանը արդեն մեկ տարի է` չի կարողանում լուծել ընդամենը 1 խումբ ունեցող մանկապարտեզի ֆինանսավորման հարցը:

Վահագնաձորում չի լուծվում ոչ միայն մանկապարտեզի, այլեւ ֆինանսական լուրջ միջոցներ չպահանջող այլ խնդիրներ: Գյուղի միջով անցնող գլխավոր մայրուղու մոտ կանգնած երկու տղամարդու հարցրի համայնքապետարանի տեղը: Նրանք ճանապարհի տակ մի փոքրիկ շինություն ցույց տվեցին: Համայնքապետարանի շենքի վրա ոչ ՀՀ դրոշն էր ծածանվում, ոչ էլ ցուցատախտակ էր փակցված, համայնքապետն էլ դեռ չէր եկել:

Մինչ նրա գալը որոշեցի ծանոթանալ համայնքապետարանի պատին փակցված մի քանի հայտարարությունների: Հիշեցի Լոռու մարզպետարանի կողմից Վահագնաձոր համայնքում իրականացված հսկողության ակտում արձանագրված թերությունների վերացման մասին համայնքապետ Էդիկ Եղոյանի 18.06.2011 թ. գրությունը` ուղղված Լոռու նախկին մարզպետ Արամ Քոչարյանին:

Գրության 6-րդ կետով համայնքապետը նախկին մարզպետին հավաստիացրել էր, թե ավագանու որոշումները փակցնելու համար համայնքապետարանում ցուցատախտակ է տեղադրել: Ցուցատախտակը չգտա: Քիչ հետո եկավ Էդիկ Եղոյանը: Պարզվեց, որ համայնքապետը չի տիրապետում «ՏԻՄ մասին» ՀՀ օրենքով սահմանված տեղական ինքնակառավարման մարմինների գործունեության հրապարակայնության պահանջներին:

«Ես օրենքին շատ լավ եմ տիրապետում, Ձեր նման 150 հատ կազմակերպություն կա, Դուք գիշեր-ցերեկ հարցնում եք: Ուրիշ բան ու գործ չունեք Ձեզ»,- զայրացած ասաց համայնքապետը:

Չափի զգացողությունը կորցնող համայնքապետի հետ հետագա աշխատանքս շարունակելու համար հարկադրված եղա դիմել Լոռու մարզպետ Արթուր Նալբանդյանի միջամտությանը, որից հետո միայն հնարավոր եղավ շարունակել աշխատանքը:

Վահագնաձոր գյուղն ունի 148 տնտեսություն, գյուղում ներկայումս գրանցված է 285 մարդ: Գյուղը վարելահողեր չունի, պարսպված է 148 հա անտառով: «Համայնքը ոչ մի տեսակ սեփականաշնորհումից չի օգտվել»,- հայտնեց համայնքապետը: Վահագնաձորը չունի անգամ բուժկետ: Համայնքի 2011 թ. բյուջեի եկամուտները պլանավորվել են 5 մլն դրամ, որից 3,5 մլն դրամը պետբյուջեից վճարվող դոտացիան է:

«Պլանավորված եկամուտներից 1,1 մլն դրամը համայնքի սեփական եկամուտներն են: Բյուջեի եկամուտների հավաքագրումը շատ վատ ենք կատարել, որը նշանակում է, որ բնակիչները վատ են ապրում, գումար չունեն»,- ասաց Է. Եղոյանը: Ապա հավելեց. «Հենց այս պահին եկամուտների հավաքագրումը կատարվել է 82%-ով: Բայց ոչ թե բնակիչների շնորհիվ, այլ մի քիչ ի շնորհիվ մեզ: Որոշակի, ինչ-որ ձեւով ստեղից-էնտեղից փող ենք բերել»,- իրեն գովեց Եղոյանը:

Համայնքի ղեկավարին հիշեցրի, որ Լոռու մարզպետարանն այս տարի Վահագնաձորում իրականացրած հսկողության ակտում արձանագրել է, որ բյուջեի եկամուտների մուտքերն ապահովել են 11,9%-ով:

«Այո, այն ժամանակ շատ քիչ էր: Մարզպետարանը մեզ մոտ ստուգումներ է անցկացրել ապրիլ ամսին: Մեր մուտքերը հիմնականում լցնում է գյուղի հանգստյան տունը եւ ամառային ճամբարը: Նրանք աշխատում են սեզոնային, բյուջեին վճարում են մոտ 400 հազար դրամ»,- ասաց Էդիկ Եղոյանը:

Ավագանու որոշումների ուսումնասիրությունից պարզվեց, որ համայնքի բյուջեի եկամուտների անբավարար հավաքագրման խնդիրը համայնքապետը լուծել է նաեւ համայնքի հողերի օտարման հաշվին: «Մենք 3512 քմ հող ենք օտարել, որից համայնքի բյուջե մուտքագրվել է 1 մլն 469 հազար դրամ»,- ասաց նա: Վահագնաձորի բյուջեի 5 մլն դրամ եկամուտներից 3,8 մլն դրամը նախատեսել են համայնքապետարանի պահպանության ծախսերի համար:

Համայնքի 2009-2012 թթ. զարգացման ծրագրով ամենահրատապ խնդիրը արտագաղթի օրեցօր մեծացումն է համարվել: Քառամյա ծրագրով նախատեսվել է գյուղի գերեզմանատան ճանապարհի բարեկարգում, գերեզմանատան նոր տարածքի հատկացում, գյուղի գազաֆիկացում, խմելու ներքին ջրագծերի կապիտալ նորոգում, մանկապարտեզի շահագործում եւ այլ խնդիրներ, որոնց լուծման համար, սակայն, ֆինանսական աղբյուրներ չեն մատնանշվում:

Էդիկ Եղոյանն ասաց, որ գյուղի գազաֆիկացման համար գազի խողովակները մոտ 30%-ի չափով հասցվել են Վահագնաձորի կենտրոն, սակայն գյուղացիներն այնքան աղքատ են, որ չեն կարողանում 70-80 հազար դրամ ծախսել եւ գազը տուն հասցնել: Քառամյա ծրագիրը համայնքի համար ոչ մի հարց չի լուծել. մնացել է որպես թուղթ:

Համայնքի ավագանու 5 անդամներից Արման Սարգսյանը 2010 թ.-ից մեկնել է Ռուսաստանի Դաշնություն եւ ավագանու նիստերին չի մասնակցում: Ավագանու 4 անդամներից մեկը` Անժիկ Խաչատրյանը, համայնքապետ Էդիկ Եղոյանի կինն է, Արմեն Եղոյանը` եղբայրը:

Կարծում ենք` այդ հանգամանքն է համայնքապետին հնարավորություն տվել օրվա ցանկացած ժամի ավագանու նիստ հրավիրել, ինչպես արձանագրված է Լոռու մարզպետարանի հսկողության ակտում. «Ավագանու նիստերը կայացվել են երկու շաբաթը մեկ անգամ, ինչպես նաեւ մեկ օրում կայացվել է երկու նիստ` օրակարգային մեկական հարցով»:

Երբ համայնքապետին հայտնեցի ավագանու անդամների հետ զրուցելու իմ ցանկության մասին, նա ասաց, որ ավագանու անդամ Վաչագան Ղեւոնդյանը Վանաձորում է, իսկ նրա կինը` Անժիկ Խաչատրյանը, ասաց, որ ավագանու անդամ Շուշանիկ Կիրակոսյանը նույնպես Վանաձոր է գնացել:

Համանքապետարանում հրաժարվեցին ինձ տրամադրել ավագանու անդամների հեռախոսահամարները: Ավագանու անդամներից ինձ հաջողվեց հանդիպել համայնքապետի կնոջը. նա շատ գոհ էր համայնքապետ ամուսնու եւ ավագանու աշխատանքներից:

Այս տարվա անցած ժամանակաշրջանում Վահագնաձորում ավագանու 9 նիստ է հրավիրվել: Քննարկվել են Վահագնաձորի 2010 թ. բյուջեի կատարման մասին հաշվետվությունը, համայնքում հողամաս օտարելու, համայնքի 2011 թ. բյուջեն հաստատելու եւ այլ հարցեր:

Ավագանին այս տարվա մարտի 28-ի որոշմամբ համայնքապետ Արմեն Եղոյանի որդուն համայնքի բյուջեից 45 հազար դրամ է տրամադրել որպես ուսման վարձ: Ավագանու նիստերի օրակարգից դուրս են մնացել գյուղի հիմնախնդիրները:

Համայնքապետ Եղոյանը զլացել է ավագանու քննարկմանը ներկայացնել նաեւ այս տարվա ապրիլին Լոռու մարզպետարանի իրականացրած հսկողության արդյունքում Վահագնաձորի համայնքապետարանի բյուջետային գործընթացներում համայնքի ղեկավարի եւ ավագանու գործունեության մասին կազմված ակտը:

Վահագնաձորի դպրոցի տնօրեն Անահիտ Ջոմարդյանը «Հետքին» ասաց, որ դպրոցի 9 դասարաններում սովորում է 32 աշակերտ: Դպրոցի դասարանների միջին ծանրաբեռնվածությունը կազմում է 5 աշակերտ: «Դպրոցի 5 լավ սովորող աշակերտներ այս ուսումնական տարում ծնողների հետ տեղափոխվել են Ռուսաստանի Դաշնություն»,- ափսոսանքով ասաց տնօրենը:

Գյուղի մայրուղուն հարող մթերային խանութում հավաքված կանայք էլ դժգոհեցին գյուղի վատ ապրելակերպից ու իրենց ամուսինների եւ ջահել տղաների` արտագնա աշխատանքի մեկնելուց:

«Տղաս էսա 3-րդ տարին է` Ռուսաստան է, չի գալիս, կնկանը ստիպված պետք է ուղարկեմ իր մոտ, տղայիս ընտանիքը քայքայվում է: Երկու երեխա ունի, կինն էլ ուսուցչուհի է:  Ընտանիքը քայքայվելուց շատ վախենում եմ»,- ասաց վահագնաձորցի Լյուդմիլա Վարոսյանը: Վահագնաձորցիները գյուղում ապագա չեն տեսնում: