HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Ալավերդիում ավագանու կատարած ծախսերը փոխհատուցել են այլ համայնքների օրինակով

Ալավերդի համայնքի ավագանու պարտականությունների իրականացման հետևանքով առաջացած ծախսերը փոխհատուցելու համար համայնքի 2014թ. բյուջեով 900 հազար դրամ է նախատեսվել:

Համայնքի ավագանին այս տարվա օգոստոսի 26-ի թիվ 44-Ա որոշումով այդ գումարից 450 հազար դրամ է հատկացրել ավագանիներին՝ իբրև կատարած ծախսերի փոխհատուցում:  Քաղաքապետ Արտավազդ Վարոսյանը փոխհատուցման վճարները հատկացնելիս ավագանիներից ֆինանսական հաշվետվություններ և ծախսերը հիմնավորող ֆինանսական փաստաթղթեր չի պահանջել:

Հարցին, թե ավագանու անդամներից յուրաքանչյուրին հատկապես որ պարտականությունների կատարման հետևանքով առաջացած ծախսերի դիմաց է փոխհատուցվել 450 հազար դրամը, Ա. Վարոսյանը պարզաբանեց. «Դե դրա մեջ կարող է տարբեր բաներ լինի: Դրա մեջ կարող է լինել թուղթ ու գրիչ, գրենական պիտույք: Կոնկրետ հոդվածներով գրած չունենք, թե ավագանու անդամների անվանական  որ պարտականությունների ծախսերի համար ենք կատարել փոխհատուցման վճարները: Ուղղակի, որպես օրենքով նախատեսված գումար, դա  ավագանու բոլոր անդամները հավասարապես  ստանում են, մեկին շատ, մեկին քիչ չի տրվում»:  

Քաղաքապետը, սակայն չասաց, թե փոխհատուցման վճարները ավագանիներին հավասար բախշելու մասին որ օրենքում է կարդացել: Ավագանու անդամների պարտականությունների հետևանքով կատարած ծախսերի  դրամական փոխհատուցման իրավունքը սահմանում է «Տեղական ինքնակառավարման մասին» ՀՀ օրենքը:

«Համայնքի ավագանու անդամն իրավունք ունի ստանալ դրամական փոխհատուցում` սույն օրենքով սահմանված կարգով իր պարտականություններն իրականացնելու հետեւանքով կատարած ծախսերի դիմաց»,- սահմանում է օրենքի 19-րդ հոդվածի 5-րդ կետը: Այսուհանդերձ  Ա. Վարոսյանը, ով  համայնքի բյուջեի թիվ  մեկ պատասխանատուն է, ավագանու որոշմամբ, համայնքի բյուջետային գործընթացները վերահսկող ավագանու անդամներին փոխհատուցման չհիմնավորվված վճարումներ է կատարել:

«Մենք ուսումնասիրել ենք այլ համայնքերի փորձը, պարզել ենք, որ մի կողմից՝ բնական է, ինչ-որ ծախսեր կատարվում է, մյուս կողմից՝ միշտ հնարավոր չէ ֆինանսական փաստաթղթեր հավաքել` ծախսերի փոխհատուցման համար»,- բացատրեց նա:

Հիշեցնենք, որ Ալավերդու ավագանին «Տեղական ինքնակառավարման մարմինների մասին» ՀՀ օրենքով սահմանված իր իրավասությունից միայն միաձայն քվեարկություններն է մեծ հաջողությամբ իրականացնում: Այլ ձեռքբերումներ բյուջեի վերահսկման գործում՝ ավագանին չի արձանագրել: Արտավազդ Վարոսյանի ասելով` քանի որ հանրապետության այլ համայնքերում առանց ֆինասական հիմնավորման է բաշխվում ավագանիների պարտականությունների կատարման հետևանքով առաջացած ծախսերի փոխհատուցումը, ինքն էլ հետևել է այդ համայնքների օրինակին: Մեծ դժվարությամբ հավաքագրվող Ալավերդու հարկատուների 900 հազար դրամ հարկերից 450 հազար դրամը, փաստորեն, 6 ամսվա կտրվածքով հավասարապես` 30 հազարական դրամներով բաշխվել է ավագանու 15 անդամներին:

Ավագանու անդամ Արմեն Կարապետյանը մեզ հետ զրուցելիս զարմացավ, որ քաղաքապետարանում ավագանու անդամների պարտականությունների կատարման հետևանքով առաջացած ծախսերը ֆինանսական փաստաթղթային  հիմնավորումներ չեն ստացել: Ա. Կարապետյանը, այնուամենայնիվ հայտնեց, որ ինքը ստացել է փոխհատուցման վճարը: Ավագանու անդամ Գագիկ Էվոյանը շատ ուրախացավ, երբ մեզանից լսեց ավագանու պարտականությունների իրականացման հետևանքով կատարած ծախսերը փոխհատուցելու ավագանու որոշման մասին: «Վերջապես որոշեցին տալ, հա, փոխհատուցման վճարները: Գիտե՞ք ինչքան եմ բարձրացրել այդ հարցը»,- ասաց նա: Գ. Էվոյանը տեղյակ չէր, որ իր երազած որոշումն ընդունվել  է դեռ երկու ամիս առաջ, օգոստոսի 26-ի ավագանու նիստով:

Որոշման քննարկմանը ավագանու 15 անդամներից ներկա են եղել 10-ը, ավագանու բացակա 5 անդամներից մեկը եղել է Գ· Էվոյանը: Պարզվեց ավագանու իր պարտականությունները կատարելու համար Գագիկ Էվոյանը շատ է ծախսել՝ Ակներ գյուղում եւ Սանահին գյուղի Մադան թաղամասում հանդիպել է գյուղացիներին հետ, նրանց բարձրացրած հարցերը ներկայացրել է ավագանու նիստում: Նա առաջացած ծախսերի մասին տեղյակ է պահել քաղաքապետին: Այսուհանդերձ, Գ. Էվոյանն ասաց, որ դեռ չի ստացել իր կատարած ծախսերի փոխհատուցումը` թեեւ որոշումից անցել է երկու ամիս: 

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter