«Հայաստանի զարգացման նախաձեռնություններ» (IDeA) հիմնադրամի գլխավոր տնօրեն Արմեն Գեւորգյանն այսօր հանդիպեց ֆրանսիացի գործարարների պատվիրակության հետ, ովքեր Հայաստան են ժամանել Հայ- ֆրանսիական առեւտրաարդյունաբերական պալատի եւ բրիտանական PMCI  ներդրումային ընկերության հրավերով՝ գործարար միջավայրին եւ իրականացվող խոշոր ծրագրերին ծանոթանալու նպատակով: Այս մասին տեղեկացնում է  հիմնադրամի հանրային կապերի բաժինը:

Պատվիրակությունը ցանկություն էր հայտնել հանդիպել նաեւ  IDeA հիմնադրամի ղեկավարության հետ՝ հիմնադրամի գործունեությանն ու իրականացվող ընթացիկ եւ նախատեսվող ծրագրերին ծանոթանալու համար:

Ա. Գեւորգյանը  տեղեկություններ ներկայացրեց IDeA-ի  գործունեության մասին՝ նշելով, որ հիմնադրամն արդեն իրականցրել է ենթակառուցվածքների զարգացման եւ կրթական այնպիսի մասշտաբային ծրագրեր, ինչպիսիք են «ՏաԹեւեր» ճոպանուղու եւ Դիլիջանի քոլեջի նախագծերը:  «Մեր հիմնական նպատակն է երկարաժամկետ ծրագրերի իրականացման միջոցով  նպաստել երկրի անցմանը գոյատեւումից դեպի բարեկեցության, զարգացման փուլ: Մենք իրականացնում ենք հիմնականում երկու տեսակի՝ ենթակառուցվածքային եւ ինստիտուցիոնալ ծրագրեր, որոնք կարող են նպաստել երկրի սոցիալ-տնտեսական զարգացման համար պայմանների ստեղծմանը»,-նշեց Ա. Գեւորգյանը՝ նկատելով, որ կոնկրետ վայրում խոշոր ծրագրի իրականացումը հանգեցնում է  նաեւ տվյալ տարածաշրջանի զարգացմանը, ինչպես  վերը նշված ծրագրերի դեպքում:

Ըստ Ա.Գեւորգյանի՝ հիմնադրամը կարեւորում է Հայաստանում զբոսաշրջության զարգացումը եւ աջակցում է ՀՀ կառավարությանը՝ այս ոլորտում ինստիտուցիոնալ եւ կառուցվածքային  բարեփոխումների, մասնավորապես, «Բաց երկնքի» քաղաքականության իրականացման հարցում: Նա նկատեց, որ Հայաստանում զբոսաշրջային ինդուստրիայի զարգացման տեսանկյունից կարեւոր նշանակություն կարող է ունենալ ֆրանսիական ընկերությունների հարուստ փորձը, եւ այս ոլորտում արդյունավետ գործակցություն կարող է ծավալվել:

Հայ-ֆրանսիական առեւտրաարդյունաբերական պալատի նախագահ Բեռնար Հաթեմյանը կարեւոր եւ հետաքրքիր համարելով հիմնադրամի աշխատանքը՝ նկատեց,որ զբոսաշրջությունը պալատի գործունեության հիմնական ուղղություններից է, եւ հնարավոր համարեց այս ոլորտում փոքր ծրագրերի իրականացումը:

Ա.Գեւորգյանն ուշագրավ համարեց զբոսավարների վերապատրաստման,IDeA հիմնադրամի ծրագրերում ընդգրկված համայնքներում փոքր ծրագրերի իրականացման առաջարկները: Նա նաեւ պատասխանեց համագործակցության հնարավորությունների մասին հյուրերի հարցերին: