Ռուսական լրատվամիջոցները երեկ օրվա վերջին տեղեկություն տարածեցին, որ Ռուսաստանը համաձայնել է ԵվրԱզէՍ հիմնադրամից Հայաստանին 400 մլն դոլար վարկ հատկացնել «Նաիրիտ» գործարանի արդիականացման համար: Նշենք, որ այդ վարկի շուրջ բանակցությունները շարունակվում էին շուրջ 2 տարի: Ըստ ռուսական աղբյուրի' հայկական կողմին մնում է միայն պաշտոնական դիմում ներկայացնել, որից հետո գործընթացը մեկ-երկու ամսում կավարտվի: Ռուսական կողմը տեղեկացնում է նաև, որ գումարը Հայաստանին հատկացվելու է երեք տրանշով' գործարանի պարտքերը մարելու և այն արդիականացնելու համար:

«Նաիրիտում», սակայն, անելանելի իրավիճակ է ստեղծվել, քանի որ գործարանի ղեկավարությունը կուտակել է հսկայական պարտքեր: «Նաիրիտի» աշխատակիցներն արդեն 4 ամիս է' աշխատավարձ չեն ստացել: «Հայացք»-ի հետ զրույցում նրանք վրդովված նշեցին, որ գործարանի ղեկավարությունը մտադիր էլ չէ մարել պարտքերը: «Անորոշ վիճակ է մեզ մոտ, ոչ գիտենք աշխատում ենք, ոչ էլ ամեն ամիս փող ենք ստանում: Մարդիկ ինչքա՞ն կարող են պարտքով ապրել»,- հարցադրում արեցին նրանք: Արդեն 1,5 տարի է' «Նաիրիտի» աշխատակիցները հարկադիր պարապուրդի մեջ են: Գործարանի ղեկավարությունն այդ ընթացքում նրանց պետք է վճարեր աշխատավարձի երկու երրորդը, սակայն այդ պարտավորությունը ամիսներ շարունակ չի կատարվում: Աշխատակիցներն էլ բարկացել են և սպառնում են դարձյալ բողոքի ցույցեր անցկացնել:

Էներգետիկայի և բնական պաշարների նախարար Արմեն Մովսիսյանից երեկ հետաքրքվեցինք, թե ինչ իրավիճակ է «Նաիրիտում»: «Հայացք»-ի հարցին ի պատասխան Ա.Մովսիսյանը բառացիորեն ասաց հետևյալը. «Աշխատավարձերը բան մասով տրվում են, էլի կտրվեն: Ինչ վերաբերում է իրականացվող ծրագին, ծրագիրն այս պահին գտնվում է էն ամենաբան քննարկման փուլում: Հրավիրել ենք դրսի մասնագետներ, որպեսզի այդ հարցերում մեզ օգնեն' ճիշտ ուղղություն ընտրելու համար, «Նաիրիտի» վերազինման, վերականգման, վերագործարկման համար»:

Երբ նախարարին տեղեկացրինք, որ գործարանի աշխատակիցները պահանջում են նախորդ ամիսների իրենց աշխատավարձը, նա պատասխանեց. «Ես չեմ տեսել տենց բան, ո՞վ ա ասել»,- ու շտապ հեռացավ: