![](/static/articles/05/81/72/l-cRtA32KrFM.jpg)
3.5 մլն դրամի ծաղիկներ ու ծաղկեպսակ՝ Կապանի քաղաքապետարանի կարիքների համար
Սյունիքի մարզկենտրոն Կապան քաղաքի խնդիրներին «Հետքը» պարբերաբար անդրադառնում է: Դրանց լուծումը քաղաքային իշխանությունները կապում են ֆինանսական միջոցների բացակայության հետ, սակայն քաղաքապետարանը միջոցներ է գտնում 3.5 մլն դրամի ծաղիկ ու ծաղկեպսակ գնելու համար:
Դեկտեմբերի 30-ին Կապանի քաղաքապետարանը պայմանագիր է կնքել Կապանում հաշվառված Ա/Ձ Նունե Թադեւոսյանի հետ, որպեսզի վերջինս մինչ 2015թ. դեկտեմբերի 31-ը քաղաքային իշխանություններին մատակարարի ծաղիկներ և ծաղկեպսակ: Պայմանագրի շրջանակում հատը 800 դրամով ձեռք է բերվել 515 հատ 70սմ-ից ոչ պակաս երկարության, թարմ կոկոն, վարդագույն, սպիտակ, դեղին կամ այլ գույնի, թափանցիկ թղթով փաթեթավորված հոլանդական վարդեր: Ընդհանուր գումարը կազմել է 412.000 դրամ:
Ձեռք է բերվել նաև 3720 հատ 70սմ-ից ոչ պակաս երկարության թարմ բացված սպիտակ կամ կարմիր գույնի մեխակներ: Այս ծաղիկների համար վճարվել է 558.000 դրամ: Կապանի քաղաքապետարանն այսքանով չի բավարարվել: Ա/Ձ Նունե Թադեւոսյանից ձեռք է բերել նաեւ 60 հատ մեծ ծաղկե զամբյուղ-կոմպոզիցիա՝ հատը 10.000 դրամով, ինչպես նաեւ 60 հատ փոքր կոմպոզիցիա՝ հատը 5.000 դրամով: Մեծ եւ փոքր կոմպոզիցիաների համար քաղաքապետարանը վճարել է 900.000 դրամ:
Գնվել է նաև 90 հատ մեծ և 110 հատ փոքր ծաղկեփնջեր, որոնց համար վճարվել է 1 մլն 180 հազար դրամ: Կապանի քաղաքապետարանը չի մոռացել նաև հանգուցյալներին: Հատը 20.000 դրամով ձեռք է բերել 25 հատ ծաղկեպսակ, ընդհանուրը՝ 500.000 դրամ արժեքով:
Մեկնաբանություններ (3)
Մեկնաբանել