Համայնքապետի ընտրություններն ակտիվ են անցնում Արմավիրի մարզի Նալբանդյան գյուղում: Այստեղ գյուղի կենտրոնում իրար հարևանությամբ երկու ընտրատեղամաս է գործում: 21/02 ընտրատեղամասում ընտրողների ընդհանուր թիվը 1632 է, որից ժամը 14.30-ի դրությամբ՝ ընտրությանը մասնակցել են 650-ը:

Թեկնածուները երկուսն են. գործող համայնքապետ Գրիգոր Մկրտչյանը և Արգիշտի Հարությունյանը: Երկու թեկնածուներն էլ Հանրապետական կուսակցության անդամներ են, սակայն կուսակցությունը սատարում է գործող համայնքապետին:

Ընտրատեղամասերի դիմաց կուտակումները շատ են, մարդկանց հոսքը չի դադարում:  Ոստիկանները երբեմն փակում են դուռը՝ մարդկանց հոսքը կառավարելի դարձնելու համար:

«Վայ, գրիչը տարել են, գրիչ բերեք, բայց կապեք, որ չտանեն»,- բղավում էր հանձնաժողովի անդամներից մեկը, երբ ընտրողներից մեկը, մոտենալով քվեախցին, հայտնաբերեց, որ գրիչ չկա: Նա խոսքը դեռ չէր ավարտվել, երբ մեկ այլ անդամ բղավում էր ընտրողի վրա, ով ստացած քվեաթերթիկն ու ծրարը ձեռքին շտապում էր դուրս, որ իրեն օգնեն: Հենց դռան մոտից նրան հետ բերեցին, քվեաթերթիկը ձեռքից վերցրին, որ նորից դուրս չվազի:

Մոտ մեկ ժամ առաջ հանձնաժողովի անդամները գրեթե հանգիստ չունեին: Քվեախցերին էին մոտենում երկու և ավելի ընտրողներ: Ոմանք էլ՝ հարևաններին էին կանչում քվեախուց, որ «իրար հետ լինեն»: Այժմ վիճակը վերահսկելի է:

Հանձնաժողովի նախագահ Մարտիրոս Սարիբեկյանը մեզ հետ զրույցում ասաց, որ «ոչ մի դիմում-բողոք չի ստացել» և ընտրություններն ընթանում են բնականոն հունով: