Սեդա Հերգնյան

«Եթե միջուկային ծրագրի շուրջ Իրանի ու «Վեցյակի» միջև ձեռք բերված համաձայնագրի արդյունքում Իրանի տնտեսական դրությունը լավանա, դա օգուտ կլինի նաև Հայաստանին», - «Հետքի»  հետ զրույցում նման տեսակետ հայտնեց ՀՀ նախկին վարչապետ, ԱԺ ՀԱԿ խմբակցության պատգամավոր Հրանտ Բագրատյանը՝ հաշվի առնելով երկու հարևան երկրների առևտրատնտեսական հարաբերությունները:

Ըստ նրա՝  այդ համաձայնագիրը Իրանին մեծ հնարավորություններ է տալիս բարելավելու երկրի տնտեսական  իրավիճակը:  Տնտեսագետը չառանձնացրեց կոնկրետ հնարավորություններ և թե արդյունքում ինչ կարող է փոխվել Հայաստանի հետ կապված տնտեսական ցուցանիշներում՝ միայն նշելով, որ այդ հնարավորությունները Իրանին կտրվեն պատժամիջոցներից ազատվելու  հետևանքով:   Եվրոպական Միությունը էմբարգո էր սահմանել  Իրանից նավթի ներկրման վրա  և սառեցրել բանկերում իրանական հաշիվները:

Հ. Բագրատյանի խոսքով՝  նշված համաձայնագիրը կարող է հանգեցնել Իրանի տնտեսական աճին:

Հիշեցնենք, որ այս տարվա ապրիլի 2-ին շվեյցարական Լոզան քաղաքում Իրանը և  միջազգային միջնորդները՝ Ռուսաստանը, ԱՄՆ-ն, Չինաստանը, Ֆրանսիան, Միացյալ Թագավորությունը և Գերմանիան  երկարատեւ բանակցություններից հետո շրջանակային համաձայնության հասան  Իրանի միջուկային ծրագրի շուրջ: Ըստ համաձայնագրի՝  մինչև  10 տարի ժամկետով սահմանափակվելու է Իրանի՝ ուրանի հարստացման և ատոմային հետազոտություններ անցկացնելու հնարավորությունը: Մինչև 15 տարի ժամկետով Իրանը չի կառուցի նոր ատոմային օբյեկտներ, և կնվազեցնի հարստացված ուրանի պաշարները:   Վերջնական համաձայնագրի մշակումը պետք է տեղի ունենա մինչև հունիսի 30-ը: 
Իսկ պատժամիջոցները շարունակելու են գործել մինչև  վերջնական համաձայնագրի կնքումն ու իրականացումը: 

Նշենք, որ 2014-ի տվյալներով՝ Հայաստանի արտաքին առևտրաշրջանառության  4.9 %-ը, ըստ ՀՀ ԱՎԾ-ի, բաժին է ընկել Իրանի հետ առևտրին: