«Ամեն ընտրությունից առաջ գնում գյուղեր էիք գազաֆիկացնում: Գազաֆիկացրել եք գյուղը, որտեղ 1-2 հոգի կարողանում են գազ օգտագործել, թե ոչ, ամբողջ գյուղի համալիրը մտնում է ինքնարժեքի մեջ և թանկանում է գազը մյուս սպառողների համար»,- ԱԺ ամբիոնից հայտարարեց պատգամավոր Հրանտ Բագրատյանը՝ անդրադառնալով ՀՀ գազամատակարարման համակարգի գործունեությունն ուսումնասիրող ժամանակավոր հանձնաժողովի եզրակացությանը:

Նա ասաց, որ իրենք ևս կատարել են ուսումնասիրություն՝ գազի գնի և սպառման ծավալների «էլաստիկությունը», և պարզել են, որ գազի գնի ցանկացած միավորի ավելացում Հայաստանում բերում է այդ միավորից ավելի սպառման ծավալների կրճատման:

«Իմ խորին համոզմամբ` այսօրվա վիճակով պետք չէ գազի սակագին հաստատել, թող արտադրողը հաստատի, որովհետև մենք չենք կարողանում ազդել սակագնի վրա: Մեր գործողությունները, մանավանդ այդ հանձնաժողովով (նկատի ունի հանրային առայությունները կարգավորող հանձնաժողովին,-հեղ.), այդ նախագահով բերում է նրան, որ մենք արդարացնում ենք մոնոպոլիստի շահերը: Այ, որ մոնոպոլիստին տայինք, ինքն ավելի շատ կմտածեր՝ շատ գազ վաճառեմ, շատ փող ստանամ, թե քիչ գազ վաճառեմ, բարձր գին ստանամ, քիչ փող ստանամ»,- ասաց Հրանտ Բագրատյանը՝ ավելացնելով, թե չի հասկանում` ինչու են հանրապետության նախագահը և վարչապետը քննարկում գազի գինը:

Ավելին, պատգամավորի ասելով՝ եթե սակագինը որոշեն ռուսները, գուցե ավելի խղճով դուրս գան, քան հայերը, որոնք սակագին սահմանելով, գուցե ակնկալիքներ ունեն:

Ըստ Բագրատյանի` երբ կար «ՀայՌուսգազարդը», ռուսները գազը վաճառում էին հայերին, իսկ այժմ` նրանք վաճառում են ռուսներին. «Մենք ի՞նչ գործ ունենք այդտեղ՝ չեմ կարողանում հասկանալ»:

Պատգամավորի կարծիքով՝ այսօր Հայաստանը գազը ստանում է 164 դոլարով, որի մասին երկու օր առաջ հայտարարել է Ռուսաստանի էներգետիկայի նախարարը, ըստ որի՝ իջել են և ներքին գները, ինչպես նաև մաքսային միության երկրներին մատակարարվող գազի գները:

Հրանտ Բագրատյանը բերեց Մաքսային միության անդամ չհանդիսացող Ուկրաինայի օրինակը, որտեղ ապրիլի 1-ից գազի գները իջել են: Նա նաև զարմացավ կորուստների բարձր տոկոսներից. «Այդտեղ ատկատ կա երևի, հա՞, ինչո՞ւ եք այդ կորուստները հաստատում: Եկեք խոսենք, սա եք անում: Պառլամենտը պետք է սրա վրա ազդի»,-ավելացրեց Հրանտ Բագրատյանը՝ մի կողմ թողնելով ռուսական գործոնը և 2013թ. դեկտեմբերի գազային պայմանագրերը:

Նա ևս մեկ անգամ հայտարարեց, որ Հայաստանը գազի սակագին սահմանելու իրավունք չունի: