HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Ինչո՞ւ Հայաստանից առաքվող դասագրքերը չեն հասնում Ջավախք

Վրաստանի կրթության և գիտության նախարարության աշխատակիցներին են տրամադրվել Ջավախք առաքման համար նախատեսված բոլոր նյութերը, ուսումնամեթոդական գրականությունից մեկական օրինակ՝ ուսումնասիրելու նրանց համապատասխանությունը Վրաստանի կրթական ծրագրերին: Մոտ ժամանակներս Վրաստանի ԿԳՆ-ից նյութերի վերջնական ցանկի վերաբերյալ համաձայնություն ստանալուց հետո դրանք կառաքվեն Թբիլիսի: «Հետքի» հարցմանն ի պատասխան՝ հայտնել է ՀՀ սփյուռքի փոխնախարար Սերժ Սրապիոնյանը:

Հիշեցնենք՝ Ջավախքի հայկական դպրոցի ուսուցիչներն ահազանգել էին, որ 2014-2015թթ. ուսումնական տարվա համար Հայաստանից գրքեր չեն ստացել: Լրատվամիջոցներն էլ հայտնել էին, որ վրացական կողմն այդ գրքերը թույլ չի տվել Վրաստանի սահմանն անցկացնել:  

Վրաստանի կրթության և գիտության նախարարությունն է պատրաստում, տպագրում և առաքում Վրաստանում գործող հայկական դպրոցների դասագրքերը: Այդ դասագրքերը հիմնականում երկլեզու են՝ հայերեն և վրացերեն:

Ինչ վերաբերում  է Հայաստանից առաքվող նյութերին, փոխնախարարը հայտել է, որ համաձայն ՀՀ ԿԳՆ և Վրաստանի ԿԳՆ միջև կնքված հուշագրի 6-րդ կետի՝ այն է՝ աջակցել Վրաստանի հայալեզու դպրոցներին հայերեն լեզվով կրթական նյութերով ապահովման և նրանց կրթական կարիքների բավարարման համար՝ ըստ Վրաստանի օրենսդրության, Վրաստանում ՀՀ դեսպանությունը ՀՀ սփյուռքի նախարարությանն է փոխանցել Վրաստանի հայկական դպրոցների համար կազմված ուսումնամեթոդական նյութերի և մի շարք դասագրքերի պահանջագրերը: Նախարարությունում քննարկվել են ստացված հայտերը և նախատեսվել յուրաքանչյուր դպրոցին մոտավորապես 40 գիրք ու նյութ:

Ըստ Վրաստանում գործող կարգի՝ դասագրքերը կարող են տրամադրվել դպրոցներին և օգտագործվել որպես լրացուցիչ կրթական ռեսուրս միայն Վրաստանի ԿԳՆ թույլտվությամբ: Նախարարությունը դիմել է ՀՀ դեսպանությանը, որպեսզի ապահովվի գրքերի տեղափոխումը՝ սահմանված կարգով՝ թույլտվություն ստանալուց հետո:

«Հարցի լուծման նպատակով նաև ՀՀ սփյուռքի նախարարության  պատվիրակությունը եղել է Վրաստանի կրթության և գիտության նախարարությունում: Նախարարության պատասխանատու աշխատակիցների հետ քննարկվել են նոր հուշագրի կնքման, ուսումնաօժանդակ նյութերի առաքման առնչվող բոլոր հարցերը: Ձեռք է բերվել համաձայնություն դրանց առաքման տեխնիկական բոլոր խնդիրների և ընթացակարգերի շուրջ»,-հայտնել է Սերժ Սրապիոնյանը:

Ըստ փոխնախարարի՝ տեղեկատվությունը, որ Վրաստանի սահմանային ծառայության աշխատակիցներն արգելել են անցկացնել Հայաստանից առաքվող խմբաքանակը, իրականությանը չի համապատասխանում: Սակայն Սերժ Սրապիոնյանը չի մանրամասնել, թե ինչու, ուրեմն, 2014-2015թթ. ուսումնական տարվա գրքերը մինչ օրս՝ 2015թ. ապրիլի 16-ը չեն հասել Ջավախք: 

Մեկնաբանություններ (1)

Ա.Ու.
իսկ հնարավոր չի ինչ է դասագրքերը լինեն համացանցում‚ ուսուցիչները իջացնեն‚ տպեն կոպիա անեն բաժանեն էրեխեքին։ Չի լինի չէ, շատ դժվար է։

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter