Թբիլիսիի Հայ եկեղեցասեր երիտասարդաց միության հերթական հավաքը, որ ընթացիկ տարվա   հոկտեմբերի 29-ին  սկսվեց Թբիլիսիի Սուրբ Էջմիածին եկեղեցում Սուրբ Հովհան Ոսկեբերանի հիշատակին  նվիրված շաբաթօրյա  ժամերգությամբ և վիրահայոց թեմի Առաջնորդ  տեր Վազգեն եպիսկոպոս Միրզախանյանի աղոթքով և օրհնության խոսքով, իր շարունակական ընթացքն  ունեցավ Վիրահայոց  թեմի Հայ առաքելական սուրբ եկեղեցուն կից գործող  «Հայարտուն» մշակույթի կենտրոնի Գալուստ Գյուլբենկյան   սրահում:       

Վիրահայոց թեմի առաջնորդ տեր Վազգեն եպիսկոպոս Միրզախանյանի, Թբիլիսիում գործող  հայկական  եկեղեցիների  հոգևոր հայրերի և եկեղեցու սպասավորների մասնակցությամբ հանդիպումը բացելով, տեր Սամվել քահանա Թորոսյանը  հայ երիտասարդներին կոչ արեց քրիստոնյա հավատքով համախմբվել Հայ առաքելական եկեղեցու շուրջը և նվիրվել ազգային արժեքների պահպանության, հայերենի տարածման վեհ և ազգապահպան գործին:

Դեռևս 2007 թվականից ցայսօր Մայր Աթոռ Սուրբ Եկեղեցու Եկեղեցասեր երիտասարդաց միության մասնաճյուղ  հանդիսացող Թբիլիսիի Եկեղեցասեր երիտասարդաց միությունն իր բոլոր ձեռնարկումների և իրականացրած գործերի  մատենագրությունը, տեսագրական հոլովակի տեսքով և հատուկ մեկնաբանություններով հավաքվածներին ներկայացրեց «Հայարտուն» մշակույթի կենտրոնի մշակույթի բաժնի վարիչ Լևոն Չիդիլյանը: 

Ուրախալի է, որ հավաքվածների շրջանում էին Սամցխե-Ջավախքից Թբիլիսիի տարբեր բարձրագույն ուսումնական  հաստատություններում սովորող մեր հայրենակիցները, որոնք Եկեղեցասեր երիտասարդաց միության գործունեությանը  ընդգրկվելու պատրաստակամություն հայտնեցին:

Միաբանված լինելու, հավատքով գործելու և ազգային դիմագիծը պահպանելու կոչով ելույթ ունեցան Հայ եկեղեցասեր երիտասարդաց միության ակտիվ անդամներ Ինեսա Սարուխանյանը, Լալա Գևորգյանը և Գիորգի Բաբախանովը:

Հանդիպման բոլոր մասնակիցները հաստատեցին իրենց պատրաստակամությունն այսուհետ ևս հավատքով և եկեղեցու  շուրջը համախմբվածությամբ նվիրվելու հայերենի տարածման, ազգային արժեքների պահպանման, հայի իսկական  դիմանկարի վերաստեղծման ազգանվեր գործին: