Ռուսաստանում պետական գնումների համար նախատեսված 1,3 տրիլիոն ռուբլու մեկ հինգերորդը փոխանցվել է օֆշորային գոտիներ:

Եվրասիական չորրորդ հակակոռուպցիոն ֆորումում  ելույթ ունենալով`  Ռուսաստանի դաշնության հաշվիչ պալատի նախագահ Տատյանա Գոլիկովան նշել է, որ Հաշվիչ պալատը եւ Ֆինանսական մոնիթորինգի դաշնային  ծառայությունը  ստեղծում է պետական բյուջեից միջոցներ ստացած  օֆշորային կազամկերպությունների սեփականատերերի  ռեեստր: Նման բազայի ստեղծման նպատակը տնտեսության ապաօֆշորացումն է:

«Մենք ուսումնասիրում ենք այն պայմանագրերը, որոնք կնքվել են այլ երկրների  իրավասության տակ գտնվող ընկերությունների հետ: Վերջին շրջանում կնքված 1,3  տրիլիոն ռուբլի արժեքով 280 ուսումնասիրված պայմանագրերից բացահայվտել են  272, 4  մլրդ ռուբլի արժեքով (21%)  50  նման գործարքներ:  280  պայմանագրերը ուսումնասիրվել են 2014 թվականի ընթացքում: Գործարքները կատարվել են 2013 թ.-ին», -հայտնել է  Տատյանա Գոլիկովան:

2014թ.  կուսամնասիրվեն  պետական գնումների 1 մլրդ ռուբլի արժեքով գործարքներ՝ պարզելու` գնացել են արդյոք պետական փողերը օֆշորներ: Ուսումնասիրվում են ոչ միայն պետական գերատեսչությունների, այլ նաեւ  պետական ընկերությունների գնումները:

«Այս ուսումնասիրությունների նպատակն է պարզել պետական գերատեսչությունների եւ պետական ընկերությունների ղեկավար պաշտոնյաների եւ օֆշորային ընկերությունների սեփականատերերի միջեւ եղած կապերը»,-ՌԲԿ-ին հայտնել  է Հաշվիչ պալատի իր աղբյուրը: Այս ուսումնասիրությունների արդյունքում հնարավոր է կատարվեն փոփոխութոյւններ  պետգնումների մասին գործող օրենսդրությունում:  Տ.Գոլիկովան հայտնել է, որ անհրաժեշտ է շտապ ընդունել  օրենք, որը կբացառի օֆշորային ընկերությունների միջոցով  պետական գնումները: 

Նման իրավիճակ է նաեւ Հայաստանում: «Հետքը» մի քանի անգամ գրել է, թե ինչպես են օֆշորային ընկերությունները հաղթել պետական գնումների մրցույթներում: Իսկ պետական գնումների մրցույթներում հաղթած հայաստանյան մի շարք ընկերությունների հիմնադիրները օֆշորային ընկերություններ են եւ նրանց սեփականատերերը, բնականաբար, հայ պաշտոնյաներ  են, կամ նրանց հարազատները: Սակայն Հայաստանի իշխանությունները ցանկություն չունեն պարզելու, թե այս կամ այն ընկերության իրական սեփականատերը ով է եւ ինչու են պետական բյուջեի փողերը հոսում օֆշորային գոտիներ:

Լուսանկարում`Հաշվիչ պալատի նախագահ Տատյանա Գոլիկովան: