Հայաստանում նախագծված սարքերը Հայաստանում էլ կարտադրվեն
Երևանի ինժեներական ասոցիացիայի «YEA Manufacturing» գործարանը կիրականացնի Հայաստանի տեխնոլոգիական ընկերությունների կողմից նախագծված սարքերի արտադրումը:
Տպասալիկները ներմուծվում կամ արտադրվում են տեղում: Դրանց վրա հավաքվում են դետալները՝ միկրոէլեկտրոնային բաղադրիչները: Եթե տպասալիկների թիվը գերազանցում է 100-ը, դրանք հավաքվում են ավտոմատացված համակարգի միջոցով: Բաղադրիչներն անցնում են թեստովարում՝ պարզելու, թե արդյոք կարելի է անցնել հաջորդ փուլ: Տպասալիկն ամբողջությամբ հավաքելուց հետո այն ենթարկվում է որակի վերահսկման և փաթեթավորվում:
«Ինչն է կարևոր՝ ամբողջ նախագիծն է էստեղ արվում: Դա մի բան չի, որ պարզապես բերվել ա էստեղ ու հավաքվում ա: Սա նախագծված է Հայաստանում ու արտադրված է Հայաստանում»,- այսօր՝ գործարանի բացման ժամանակ, ասաց արտադրամասի ղեկավար Արսեն Առուստամյանը: Վերջինս չգիտի, թե արդյոք կան նմանատիպ այլ արտադրամասեր, բայց վստահ է, որ իրենք առաջիններից մեկն են: Արտադրամասի ղեկավարը կարևորում է հատկապես այն, որ իրենք ոչ միայն արտադրումն են իրականացնում, այլև դրան նախորդող՝ նախագծի համար արտադրման պրոցես ստեղծելու փուլը:
Գործարանը այժմ համագործակցում է մեկուկես տասնյակ տեղական ընկերությունների հետ: Արսեն Առուստամյանը չցանկացավ նշել դրանց անունները, քանի որ չգիտի, թե որքանով է այդ տեղեկությունը «կոնֆիդենցիալ»: Պատվերների մեծ մասը, իր տեղեկություններով, արտահանվում է:
«YEA Manufacturing»-ը դեռևս ունի 15 մասնագետներից բաղկացած տեխնիկական աշխատակազմ: Ընդգրկված են տարբեր որակավորում ունեցող անձինք, օրինակ՝ բարձրագույն կրթությամբ ճարտարագետներ՝ տեխնոլոգիական պրոցեսը մշակելու համար կամ միջին մասնագիտական կրթությամբ մասնագետներ՝ տպասալիկները հավաքելու համար:
«Մենք հստակ ունենք աշխատակազմ՝ 15 հոգանոց: Բնականաբար, արտադրության մեջ միշտ լինում են պիկային պատվերների պահեր: Այդ դեպքերում մենք ունենում ենք մասնագետներ, որոնց ներգրավում ենք՝ պիկային պահանջարկը բավարարելու համար»,- ասաց Ա.Առուստամյանը:
Տեխնիկական անձնակազմն այժմ տեղակայված է մեկ սենյակում՝ Ձեռնարկությունների ինկուբատոր հիմնադրամի տարածքում: Ընկերության հիմնական նպատակը, ըստ արտադրամասի ղեկավարի, Բագրևանդում (Ջրվեժ) կառուցվելիք ինժեներական քաղաք տեղափոխվելն ու ավելի ընդլայնված մասշտաբներով գործելն է:
Լուսանկարը՝ yerevan.today-ից
Մեկնաբանել