Արմինե Ղուկասյան

Օգտակար ու համայնքապահպան նախաձեռնության հերթական օրինակը գրանցվեց Գագարինում. նախկին զբոսայգին կրկին վերակենդանացնելու նպատակով գագարինցիների ցանկությունը 2013թ. մի քանի նախաձեռնողներ ներկայացրին Սեւանի քաղաքապետ Ռուդիկ Ղուկասյանին: Սկզբում ամեն ինչ թվում էր միայն բարի ցանկություն, սակայն 2015թ. զբոսայգին իրականություն դարձավ:

Նախաձեռնության հեղինակներից Սայաթ-Նովա Բադալյանը ներկայացնում է. «Գագարինում շատ բան է փոխվել անցյալ դարի 90-ականներից սկսած: Երբեմնի արդյունաբերական բնակավայրը կամաց-կամաց կորցրեց իր աշխուժությունը, իրար հետեւից փակվեցին գործարանները, մարդիկ կորցրին աշխատանքը: 20 տարի առաջ Գագարինում եղած զբոսայգին ավելորդ շքեղություն էր թվում, եւ բնակիչները տարածքը բաժան-բաժան արին` վերածելով փոքրիկ բանջարանոցների: Սակայն պետք էր սկսել ինչ-որ բանից, իսկ զբոսայգին այն սպասված վայրն էր, որը միավորելու էր մեծ ու փոքրին, դառնալու էր շփման կենտրոն»:

Գագարինցի Դավիթ Գալստյանը դարձավ բարեգործական ձեռնարկի հեղինակ՝ Սայաթ-Նովա Բադալյանի եւ Գագիկ Համբարձումյանի աջակցությամբ տեղի բնակիչներին նվիրեց հանգստի ու ժամանցի մի հիանալի վայր: Նրանք դարձան ոչ միայն նախաձեռնության հեղինակներ, այլ նաեւ կարողացան իրենց ոգեւորությամբ համակել գագարինցիներին, իրենց լավատեսությունը փոխանցել նրանց: Օրերս էլ զբոսայգին հարստացավ փոքրիկների համար այնքան սպասված խաղամիջոցներով, որոնք ձեռք են բերվել համայնքային միջոցներով:

Գագարինում կառուցված զբոսայգին բնակիչների երբեմնի մտերմությունն ու համերաշխությունը վերականգնելու հաջողված օրինակ է, իսկ հունիսի 1-ին` այգու պաշտոնական բացումից հետո մեծ ու փոքրի համար ժամանցի կազմակերպման հիանալի ու սպասված վայր է դառնալու: Սա ապացուցում է նաեւ այն պարզ ճշմարտությունը, որ ցանկությունից իրականություն տանող ճանապարհը հասանելի է եւ միանգամայն իրատեսական: