Ալավերդու թիվ 6 մանկապարտեզի 120 երեխաներ ապրիլի 23-ին Քրիստոսի հարության' Սուրբ Զատիկի տոնը նշեցին ավանդական արարողակարգով:

Մանկապարտեզի բոլոր հինգ խմբերի երեխաների ճաշասեղաններին դրված էին նորածիլ ցորեն, կարմիր և այլ գույներով ներկված հավկիթներ և չամիչով հաց:

Ավագ խմբի 25 երեխաներ հանդես եկան Քրիստոսի հարության մասին ներկայացմամբ: Երեխաները փառաբանեցին Տիրոջը, իսկ Տերը ոգեկոչեց. «Թողեք ինձ մոտ գան երեխաները, քանզի նրանցն է երկրի թագավորությունը»:

Երեխաներից Նանեն Տիրոջից խնդրեց. «Տատիկիս տուր առողջություն», Սյուզին մայրիկի ու հայրիկի համար ժպիտ խնդրեց, փոքրիկ Վերոնիկան Տիրոջը հայտեց իր մեծ երազանքը. «Քույրիկ եմ ուզում, կամ էլ ապերիկ», Դավիթն էլ խնդրեց երկրին խաղաղություն:

Փոքրիկները խնդրեցին նաև անհոգ մանկություն. «Տեր, թոն արա, թոն-թոն արա, գարի հացը բոլ-բոլ արա»,-միաբերան Տիրոջից խնդրեցին երեխաները:

Փոքրիկները ներկայացրին նաև աստվածաշնչյան 10 պատվիրանների ու «Ոսկե օրենքի» խորհուրդը: Խոստացան սրբությամբ կատարել Տիրոջ պատվիրանները և մարդկանց հետ վարվել այնպես, ինչպես կցանկանային իրենց հետ վարվեն:

Ներկայացումը ուղեկցվում էր երեխաների երգերով և պարերով:

Մանկապարտեզի վարիչ Անահիտ Հախվերդյանը ներկայացման ավարտին երեխաներին ողջունեց. «Քրիստոս հարյավ ի մեռելոց»: «Օրհնյալ է հարությունը Քրիստոսի»,- միաձայն պատասխանեցին երեխաները:

Ներկայացումից հետ մանկապարտեզի բոլոր 5 խմբերում ացկացվեցին «Զատիկի» տոնի հետ կապված պարապունքներ և ձվախաղ, որից հետո երեխաները ճաշակեցին «Զատիկի» գունավոր հավկիթները:

Մանկապարտեզի վարիչ Անահիտ Հախվերդյանը ներկայացումից հետո «Հետքին» ասաց. «Մի կողմից խնդիր ենք ունեցել Հայ առաքելական եկեղեցու կարևորագույն տոներից մեկի' Զատիկի հոգևոր իմաստը ուսուցանել երեխաներին, մյուս կողմից նկատում ենք, որ մանկապարտեզի շատ երեխաների ծնողներ տարբեր աղանդների մեջ են ընգրկում մեր երեխաներին, որն էլ բացասական է ազդում նրանց հոգևոր դաստիարակության վրա: Փորձել ենք երեխաների' Հայ առաքելական ոգով դաստիարակելու խնդիրը այս կերպ լուծել»:

Թիվ 6 մանկապարտեզը Ալավերդիում մեծ համբավ ունեցող մանկապարտեզներից է: Մանկապարտեզում ընդգրկվելու երեխաների պահանջարկը մեծ է. «Բավականին երեխաների հերթագրում ենք մանկապարտեզում տեղ բացվելու դեպքում ընդունելու համար, սակայն դպրոցահասակ երեխաներին չենք մերժում, բոլորին անվերապահ ընդունում ենք»,- ասաց Անահիտ Հախվերդյանը:

Մանկապարտեզի փոքրերի խմբերում ընդգրկված են 20, իսկ միջին և ավագ խմբերում' 25-ական երեխաները: Մանկապարտեզը ապահովված է նաև մասնաետ-կադրերով: