«ՏաԹեւեր» ճոպանուղու «Հալիձոր» կայանի հարակից տարածքում այսօր տեղի է ունեցել «Ոչխարների խուզում» փառատոնը: Արդեն երկրորդ անգամ  անցկացվող փառատոնի գլխավոր  նպատակը, ըստ կազմակերպիչների, Տաթեւը որպես զբոսաշրջային ուղղություն գրավիչ դարձնելն:

Միջոցառման հիմնական նախաձեռնողը «Տաթեւի վերածնունդ» ծրագիրն իրականացնող «Հայաստանի զարգացման նախաձեռնություններ» (IDeA)  հիմնադրամն է: Վերջինիս գլխավոր տնօրեն Արմեն Գեւորգյանի կարծիքով այսպիսի միջոցառումները լավ հնարավորություն են, որպեսզի զբոսաշրջիկներն այցելեն Տաթեւ, ծանոթնանան տեղի ավանդույթներին, հյուրընկալվեն համայնքներում գործող B&B դասի հյուրատներում, օգտվեն տեղի բարիքներից՝ ձևավորելով համապատասխան առաջարկներ: 

Կազմակերպիչները, որպես արդյունք, ակնկալում են, որ «Տաթեւի վերածնունդ» ծրագրում ընդգրկված ինը համայնքների սոցիալ-տնտեսական կյանքը նմանատիպ միջոցառումների արդյունքում կաշխուժանա: 

«Տաթեւի վերածնունդ» ծրագրի ղեկավար Հայկ Թութունջյանը նշում է, որ  աշխատում են տարածաշրջանում գործող մոտ քսան B&B դասի հյուրատների հետ, որպեսզի նրանք ի վիճակի լինեն պատշաճ որակի ծառայություններ մատուցել: 

«Փառատոնից ակնկալվող արդյունքը համայնքային տնտեսությունների  զարգացումն է: Այսինքն, զբոսաշրջիկը, այսպես ասած, պետք է գա, վայելի փառատոնը ու տարբեր ծառայություններ ստանալով՝ գումար  թողնի համայնքում: Մենք ուրախ ենք, որ շատ զբոսաշրջային ընկերություններ ոչխարների խուզման փառատոնն արդեն ներառում են իրենց առաջարկներում եւ ժամանակացույցերում»,- ասել է Հայկ Թութունջյանը:

Համայնքներից ամեն մեկը փառատոնի ժամանակ ներկայացել է առանձին տաղավարով՝ զբոսաշրջիկներին առաջարկելով սեփական արտադրանքը: Ոչխարների  խուզման մրցույթին մասնակցել են «Տաթեւի վերածնունդ» ծրագրում ընդգրկված համայնքների բնակիչներ: Ութ համայնքից ընտրված ինը մասնակիցները երեք փուլերով մրցել են հաղթողի կոչմանն արժանանալու համար: Ժյուրին որոշել է հաղթողին՝ հաշվի առնելով խուզման տեւողությունն ու որակը:

Առաջին տեղը զբաղեցրել է Վերիշեն համայնքից Սեյրան Մկրտչյանը: Փառատոնի կազմակերպիչների կողմից մասնակիցներին եւ հաղթողին խրախուսական  մրցանակներ են շնորհվել: Այս մասին տեղեկացնում է IDeA հիմնադրամը: