Սեպտեմբերի 24-ին Բրյուսելի «Վորստ նացիոնալ» լեփլեցուն մարզադահլիճում կայացավ թայ-բոքսի մի հետաքրքիր մրցամարտ: Աշխարհի եռակի չեմպիոն, մի քանի գոտիների ասպետ, հոլանդացի Անդի Սավըրի հետ մրցում էր Հարութ Գրիգորյանը: Ըստ մրցամարտի մեկնաբանի, ATV հեռուստամեկնաբանի,  «Գազետ վան Անտվերպեն»-ի թղթակցի, մեծաթիվ մասնագետների հայտնած կարծիքների` Հարութը ջախջախեց Անդիին երեք ռաունդներում էլ: Եւ դատավորների որոշումը` մրցել մի լրացուցիչ ռաունդ էլ` իբր դժվարացել են կողմնորոշվել:

Դահլիճն ալեկոծվեց, սուլոցների տարափ իջավ դատավորների գլխին. կարծես նախապես որոշել էին մարտի ելքը: Միայն Հարութը չընդվզեց, հանգիստ, մեծ մարզիկին վայել պահվածքով գնաց լրացուցիչ մարտի: Ռինգի դատավորը, թվաց, Հարութի ձեռքը պիտի բարձրացնի: Ավա~ղ, ընդունվեց անարդար, անազնիվ, ստոր, բացահայտ անամոթ որոշում: Մարզիչ, թայ-բոքսի աշխարհի չեմպիոն Դանիելան ասաց` մեր հաղթանակը գողացան մեզանից: Մրցամարտի մեկնաբանը, որ աներկբայորեն Հարութին էր վերագրում հաղթանակը եւ գովեստի խոսքեր շռայլում, կարծես սփոփանքի համար ասաց` Հայաստանը պիտի հպարտանա, որ ունի Վիկ Դարչինյան, ունի Հարութ Գրիգորյան:

22 տարեկան է Հարութ Գրիգորյանը:  Ծնունդով երեւանցի է, սովորել է Թելմանի անվան դպրոցում, 1999-ից ապրում է Անտվերպենում:

14 տարեկանից զբաղվում է թայ-բոքսով: Ունի նաեւ ադամանդագործի մասնագիտություն, սիրում է շարժանկարներ դիտել: Հարութը հրապուրվեց թայլանդական այս մարզաձեւով, հրապուրվեց ու կարճ ժամանակում գրավեց մասնագետների ուշադրությունը: 

Քրտնաթոր ու անկոտրում կամքը տվեց հիանալի արդյունք. 2004-ին դարձավ Բենելյուքսի երկրների չեմպիոն, 2006-ին եւ 2007-ին հռչակվեց Բելգիայի չեմպիոն: Ի դեպ`  նույն թվերին, համապատասխան ֆեդերացիայի որոշմամբ ճանաչվել է Բելգիայի լավագույն ատլետ: Իր մարզչուհի Դանիելա Սոմըրսի ղեկավարությամբ  Հարութը  2009-ին նվաճեց Եվրոպայի չեմպիոնի տիտղոսը:

Առջեւում աշխարհի առաջնությունն է, Իսպանիայում: Վստահաբար կարելի է ասել` 70 կգ քաշային կարգում Հայաստանի դրոշի ներքո կփայլի մի նոր աստղ` Հարութ Գրիգորյան անուն-ազգանունով:

«ԼՐԱԳԻՐ» ամսաթերթ
Անտվերպեն, Բելգիա