Այսօր Ալավերդի քաղաքում քաղաքապետի ընտրություններ են: Ընտրական գրեթե բոլոր տեղամասերի բակերում և դրանց հարող տարածքներում թեկնածուների թիմակիցների մեծ կուտակումներ կան: Գրեթե բոլոր ընտրական  տեղամասերի բակերում կանգնած են հատկապես  թեկնածու Կարեն Փարեմուզյանի մարդիկ: Մարդատար ավտոմեքենաների երկողմանի մեծ կուտակումներ կան Ս. Սարահարթ թաղամասի կենտրոնական փողոցի վրա գտնվող՝ Կարեն Փարեմուզյանի շտաբի մոտ: Դա խանգարում է ավտոմեքենաներով թիվ 11, 12, 10, 9, 8 ընտրական  տեղամասեր գնացող ընտրողների երթևեկությունը: Ժամը 12-ից ճանապարհային ոստիկանությունը մի փոքր բեռնաթափեց թեկնածուի շտաբին հարող փողոցը ավտոմեքենաներից, սակայն կարճ ժամանակ անց շտաբի մոտ դարձյալ ավտոմեքենաներ կուտակվեցին: 

Ընտրությունները խաղաղ են ընթանում ընտրական տեղամասերում, որտեղ  ժամը 11-ից հետո  սկսվեց  ընտրողների ակտիվ հոսք: 31/12 տեղամասային հանձնաժողովի անդամ, ՀԱԿ-ի ներկայացուցիչ  Ռուբեն  Ոսկանյանը ընտրողներից մեկին ժամը 11 :00-ին համառորեն առաջարկվում էր օգնությամբ ընտրություն, որի կարիք ընտրողը չէր զգում: Մենք հանձնաժողովի նախագահի ուշադրությունը հրավիրեցինք դրա վրա, որից հետո հանձնաժողովի նախագահ Համլետ Լալայանը սաստեց հանձնաժողովի անդամին: Թիվ 31/05 ընտրատեղամասում 12:30-ին մեկ քվեախցիկում  միաժամանակ ընտրում էր  երկու կին, որոնք չունեին ընտրական հանձնաժողովի թույտվությունը: Մեր լուսանկարելուց հետո տեղամասային հանձնաժողովի նախագահը ընտրողներից մեկին դուրս հրավիրվեց քվեախցիկից:

Թիվ 31/9 ընտրատեղամասում Արթուր Աբգարյանի վստահված անձ Ազատ Մակարյանի կողմից  բացահայտվել է, որ Ս. Սարահարթի 1/4 շենքի  ընտրող Արմեն Անտաշյանի անվան դիմաց ընտրացուցակում ստորագրել է նույնպես 1/4 շենքի  ընտրող Անժելա Նիկողոսյանը. «Դեպքը գրանցամատյանում գրանցված է,  հանձնաժողովը ընտրության արդյունքերը ամփոփելիս դրան կտա գնահատական»,- ասաց հանձնաժողովի նախագահ Վաղարշակ Ղորխմազյանը:

Նշենք, որ 1300 ընտրող ունեցող թիվ 31/9 ընտրական տեղամասը գտնվում է  Ս./Սարահարթ թաղամասի բնակշահագործման տեղամասի պետի փոքրիկ աշխատասենյակում, որտեղ  ընտրողների, վստահաված անձերի և դիտորդների ազատ շարժը չի ապահովվում: Թիվ 31 ընտրատարածքային հանձնաժողովի նախագահ Վռամ Վանյանի տեղեկացմամբ քաղաքի 15 ընտրական տեղամասերի 16 473 ընտրողներից ժամը 17:00-ի դրությամբ ընտրությանը մասնակցել է 7888 ընտրող, որը կազմում է ընտրողների 47,8 տոկոսը: Վռամ Վանյանը նաև հայտնեց, որ ժամը 17:00-ի դրությամբ թիվ 31 ընտրածաքային հանձաժողովին ահանզանգել են դրոշմակնիքների թանաքի հետքի արագ վերացման և թիվ 31/9 ընտրատեղամասում ուրիշի  փոխարեն ընտրելու ահազանգեր:

Հիշեցնենք, որ այսօր քաղաքապետի պաշտոնի համար Ալավերդիում մրցակցում են անկուսակցական Արթուր Աբգարյանը և Հանրապետական կուսակցության աջակցությունը վայելող Կարեն Փարեմուզյանը: