Ախալքալաքում ևս նշել են 1915թ.-ի Հայոց Ցեղասպնության 96-րդ տարելիցը: Ապրիլի 23-ին երիտասարդները ջահերով երթ են կազմակերպել: Երթը շարժվել է դեպի Մշակույթի տուն, ապա երիտասարդները Ախալքալաքի մունիցիպալիտետի ժողովի ընդունարան են հանձնել իրենց ուղերձ-նամակը, որում մասնավորապես կոչ են անում Ախալքալաքի մունիցիպալիտետի ժողովի պատգամավորներին ոչ միայն գնալ ապրիլի 24-ին մոմեր վառել եկեղեցում անմեղ զոհերի հիշատակին և ծաղիկներ դնել հուշաքարերին ու խաչքարերին, այլ նաև հարցը ներկայացնել Վրաստանի պառլամենտ' խնդիրը օրակարգ մտցնելու և 1915թ. Հայոց Ցեղասպանության փաստը պետականորեն ճանաչելու ու դատապարտելու պահանջով: «Այնժամ դուք հիրավի կհաստատեք Ձեր ժողովրդի իսկական ընտրյալներ լինելու փաստը:

-Վրաստանի պառլամենտի բոլոր պատգամավորներին ասում ենք' մենք' Վրաստանում ապրող հայերս մեր երկրի լիարժեք ու օրինապահ քաղաքացիներն ենք, հանուն արդարության վերականգման ու ողջ Վրաստանի երեխաների ապագայի, հաշվի չառնելով ոչ մի խոչնդոտ, կոչեք իրերը իրենց անուններով' ընդունեք Հայոց Ցեղասպանության փաստը ու դատապարտեք այն...

ԱՐԴԱՐՈՒԹՅՈՒՆ-այս է պահանջում անմեղ զոհերի սուրբ արյան կանչը»:

Ախալքալաքի Սուրբ Խաչ եկեղեցում մատուցվել է հոգեհանգստի պատարագ:

Լուսանկարը' Արմեն Գրիգորյանի