ԱԳ նախարար Էդվարդ Նալբանդյանն այսօր ընդունել է Ֆրանկոֆոնիայի միջազգային կազմակերպության պատվիրակությանը՝ գլխավոր քարտուղարի հատուկ խորհրդական, Երևանում կայանալիք Ֆրանկոֆոնիայի արտգործնախարարների համաժողովի անցկացման նախապատրաստական հանձնաժողովի նախագահ, դեսպան Ժակ Բիլոդոյի գլխավորությամբ։ Այս մասին տեղեկացնում է արտաքին գործերի նախարարությունը:

Ողջունելով հյուրերին՝ նախարար Նալբանդյանը նշել է. «Հայաստանի արտաքին քաղաքականության համար տարին բավականին հագեցած է և դրան գալիս է լրացնելու շուրջ ութ տասնյակ բարձրաստիճան պատվիրակությունների մասնակցությամբ Երևանում անցկացվելիք Ֆրանկոֆոնիայի նախարարական համաժողովը: Հայաստանը կանի առավելագույնը՝ այն բարձր մակարդակով կազմակերպելու նպատակով»։

Շնորհակալություն հայտնելով ընդունելության համար՝ դեսպան Բիլոդոն փոխանցել է Ֆրանկոֆոնիայի միջազգային կազմակերպության գլխավոր քարտուղար Միկաել Ժանի ողջույնները։

Ժակ Բիլոդոն Էդվարդ Նալբանդյանին տեղեկացրել է իր գլխավորած պատվիրակության այցի ընթացքում ունեցած հանդիպումների և քննարկումների մասին՝ վստահություն հայտնելով, որ հայկական կողմը ըստ պատշաճի կընդունի նախարարական համաժողովը։

Հանդիպմանը քննարկվել են Երևանում հոկտեմբերին կայանալիք համաժողովի անցկացմանն առնչվող մի շարք կազմակերպչական հարցեր։