TEDxKids@Yerevan թիմը հայտնում է, որ հունիսի 23-ին Երևանում՝ Թումո ստեղծարար տեխնոլոգիաների կենտրոնում, տեղի կունենա 4-րդ TEDxKids@Yerevan միջոցառումը, որը պաշտոնապես արտոնագրված է միջազգային TED կազմակերպության կողմից և առաջնորդվում է TED-ի` «գաղափարներ, որոնք արժանի են տարածման» սկզբունքով: Միջոցառմանը կմասնակցի ավելի քան 300 երեխա Երևանից և մարզերից: TEDxKids@Yerevan 2015 միջոցառման թեման մանկական երևակայությունն է:

TEDxKids@Yerevan միջոցառման ընթացքում, տեսագրված TED ելույթների ընտրանու  ցուցադրման հետ մեկտեղ ելույթ կունենա 12-18  տարեկան 23 բանախոս, ոմանք՝ հատուկ կարիքներով: Նրանք խոսելու են իրենց ամենահամարձակ ու ամենահետաքրքիր գաղափարների մասին:

Սամվելը   խոսելու է  մարդկային երևակայության և դրա հետևանքների մասին: Ստեֆանին պատմելու է այն մասին, թե ծնողները ինչ չգիտեն իրենց երեխաների մասին: Լևոնը կխոսի տեխնոլոգիաների և դրանցից չվախենալու մասին: Մերին իր ելույթով փորձելու է համոզել, որ կարևոր է երեխաներին կրթել մարդկային ուղեղի մասին: Շուշանը խոսում է պաղպաղակի հետ կապված իր երազների մասին: Ազատը խոսում է ընտանեկան բռնությունների վատ հետևանքների մասին: Լենան բացահայտելու է կամավորության անփոխարինելի դասերը:  Ըստ Ժորաի՝ էկո-ակումբները կարող են կրթել մեր երեխաներին ավելի պատասխանատու լինել  շրջակա միջավայրի նկատմամբ: Գոռը պատմելու է հայկական հյուրասիրության վատ հետևանքների մասին:

Այս տարի առաջին անգամ միջոցառման  խորագրի հետ կապված երգ է գրվել ՄԱԿ-ի մանկական հիմնադրամի #Imagine նախաձեռնության շրջանակներում, ըստ որի Ջոն Լենոնի հանրահայտ Imagine երգի կատարման տաբերակներ են ստեղծվում և տարածվում աշխարհում: Այս նախաձեռնության շրջանակներում, Թումոյի հետ հատուկ համագործակլցությամբ,  Imagine երգի համար հայերեն բառեր են գրվել Tumo TED-Ed Club-ի անդամների կողմից: Երգը ձայնագրվել է կենտրոնի երաժշտական ստուդիայում, ուսանողների մասնակցությամբ նկարահանվել է տեսահոլովակ, որը կցուցադրվի TEDxKids@Yerevan-ի բացման ժամանակ:

Բազմաթիվ հայ երեխաներ, իրենց TEDx ելույթների շնորհիվ, նկատվել են  համաշխարհային ճանաչում ունեցող ԲՈՒՀ-երի և մրցույթների կողմից: Ըստ TEDxKids@Yerevan-ի կազմակերպիչ Քրիստինե Սարգսյանի՝  նման  միջոցառումներ կազմակերպելու հիմնական նպատակը հայ երեխաներին լսելի և տեսանելի դարձնելն է ամբողջ աշխարհում:

TEDxKids@Yerevan 2015-ը հնարավոր է դարձել Թումո ստեղծարար տեխնոլոգիաների հետ համագործակցության և մի շարք կազմակերպությունների՝ Վորլդ Վիժն Հայաստանի, ՄԱԿ-ի մանկական հիմնադրամի, Հայկական Կարիտասի և Ինդիգո մանկական ակումբի աջակցության շնորհիվ:

Նախորդ տարվա TEDxKids@Yerevan միջոցառումը կրում էր «Մանկան երևակայություն» խորագիրը: TEDxKids@Yerevan բանախոսների ելույթները դիտելու համար այցելեք http://kids.tedxyerevan.com/ կայք: Այս տարվա բոլոր ելույթները նույնպես կտեսագրվեն և ավելի ուշ կտեղադրվեն միջոցառման կայքում, ինչը կնպաստի հայ երեխաների բարձրաձայնած խնդիրների տարածմանը հանրության առավել լայն շրջանակներում: