Երեւանի քաղաքապետի առաջին տեղակալ, քաղաքապետի պաշտոնակատար Տարոն Մարգարյանի աջակցությամբ Երեւանի քաղաքապետարանի աշխատակազմի մշակույթի վարչությունը Ռուսաստանի Դաշնության «Նոր անուններ» միջտարածաշրջանային բարեգործական հասարակական հիմնադրամի հետ համատեղ կազմակերպած հատուկ լսումներին նոյեմբերի 1-3-ը մասնակցել են քաղաքապետարանի ենթակայության երաժշտական եւ արվեստի 25 դպրոցների 10-ից 18 տարեկան 25 պատանի երաժիշտներ:

Մոսկվայի տանը կայացած եզրափակիչ համերգի և լսումների արդյունքում լավագույնը ճանաչված  վեց մասնակիցներ պարգեւատրվել են դիպլոմներով եւ միանվագ կրթաթոշակով, ինչը հնարավորություն կտա պատանի երաժիշտներին մեկնել ՌԴ եւ վարպետության դասեր ստանալ լավագույն մասնագետներից:

«Բոլոր մասնակիցներն էլ տաղանդավոր են ու, ըստ այդմ, բավականին դժվար էր ընտրություն կատարելը: Ցավոք, բոլորին չէ, որ հնարավորություն ունենք պարգեւատրելու, բայց և շատ կցանկանայի, որ նրանք բոլորն էլ մնային ուշադրության կենտրոնում: Համոզված եմ` այս երաժիշտներին սպասվում է մեծ ապագա»,-նշել է ՌԴ «Նոր անուններ» միջտարածաշրջանային բարեգործական հասարակական հիմնադրամի փոխնախագահ Էդուարդ Բարզովը:

Կարեւորելով ԱՊՀ երկրների միջեւ մշակութային հաղորդակցության անհրաժեշտությունը` Էդուարդ Բարզովը նշել է, որ հիմնադրամը շահագրգիռ է նմանատիպ միջոցառումների անցկացմամբ եւ, հնարավորության դեպքում, դրանք կկազմակերպվեն ավելի հաճախակի:

Այս մասին հայտնում է Երևանի քաղաքապետարանի տեղեկատվության և հասարակայնության հետ կապերի վարչությունը: