Տաթեւ այցելող եւ «ՏաԹեւեր» ճոպանուղու ծառայություններից օգտվել ցանկացող զբոսաշրջիկներն արդեն կարող են ճոպանուղու տոմսերը նախապես գնել օնլայն եղանակով՝ այցելելով  ճոպանուղու պաշտոնական կայք՝ www.tatever.am: Այս մասին տեղեկացնում է «Հայաստանի զարգացման նախաձեռնություններ» (IDeA) հիմնադրամի հանրային կապերի բաժինը: 

«Սա հայաստանյան զբոսաշրջային ուղղություն ներկայացնող առաջին կայքն է, որը տոմսերի օնլայն վաճառքի հնարավորություն է առաջարկում: Այս մեխանիզմը  հաջողությամբ կիրառվում է արտերկրում եւ, հատկապես, զարգացած զբոսաշրջային կենտրոններում: Մեր նպատակն է օգտագործել միջազգային լավագույն փորձը եւ ավելի մատչելի ծառայություններ մատուցել ճոպանուղի  այցելող զբոսաշրջիկներին,  որպեսզի նրանք կարողանան հնարավորինս արդյունավետ պլանավորել իրենց ժամանակը եւ վայելել Տաթեւը»,- հիմնադրամին փոխանցել է «ՏաԹեւեր» ճոպանուղու տնօրեն Վահե Բաղդասարյանը:

Օնլայն եղանակով տոմսերի գնման համակարգի ներդրումը, ինչպես տեղեկացնում է հիմնադրամը, «ՏաԹեւեր» ճոպանուղում շարունակաբար իրականացվող՝  զբոսաշրջիկների համար հարմարավետ պայմանների ստեղծմանն ուղղված աշխատանքների մի մասն է:

Ճոպանուղում ներդրվել է SKIDATA ընկերության տոմսերի վաճառքի միջազգային համակարգը:

«Տոմսերի գնման օնլայն համակարգը ինտեգրված է  SKIDATA-ի համակարգի հետ, եւ երբ այցելուն ցանկանում է կայքի միջոցով գնել տոմսը, նրան առաջարկվում է ընտրել իրեն հարմար օրը եւ ժամը, այնուհետեւ այդ միջակայքում ընտրել ազատ չվերթը: Վճարումն իրականացվում է բանկային քարտի միջոցով, անվտանգությունը  երաշխավորվում է  բանկային համակարգում կիրառվող ծրագրային ապահովման համակարգով: Այսպիսով, տոմսը  հնարավոր է ձեռք բերել արագ, առանց հերթ կանգնելու: Սա իսկապես նորույթ է հայաստանյան շուկայում»,- հիմնադրամին տեղեկացրել է կայքի պատրաստման և տոմսերի գնման օնլայն համակարգի ներդրման աշխատանքներն իրականացրած BigBek ընկերության ղեկավար Գարիկ Գյուլասարյանը:

Արդիականացվել է նաեւ «ՏաԹեւեր» ճոպանուղու պաշտոնական կայքը: Հիմնադրամի տեկեկացմամբ` այցելուն ոչ միայն կարող է  տոմս գնել, այլ նաեւ տեղեկանալ զբոսաշրջային այս տարածաշրջանում մատուցվող տարբեր ծառայությունների, կազմակերպվող միջոցառումների, գործող հյուրանոցների ու հյուրատների վերաբերյալ, գտնել այն ողջ տեղեկատվությունը, ինչ անհրաժեշտ է զբոսաշրջիկին, ընդ որում՝ ոչ միայն Տաթեւի տարածքի, այլեւ ճանապարհին գտնվող տեսարժան վայրերի մասին: