Պաշտպանության նախարարության Տեղեկատվության եւ հասարակայնության հետ կապերի վարչությունը այդպես էլ չի ուզում պատասխանել մեր հարցմանը։ Զանգերին ի պատասխան՝ ընդամենը ասում են, որ կպարզեն, կզանգեն։ Երեւի մի քանի տասնյակ աշխատակիցներով եւ նույնքան էլ զինվորներով համալրված վարչությունն այդպես էլ չի հասկացել, թե ինչի համար է այն ստեղծվել։ Քանի որ ընդունված ձեւով նրանցից տեղեկություն ստանալ հնարավոր չի, ստիպված դիմում ենք նախարար Սեյրան Օհանյանին, որպեսզի ստանանք մեր հարցերի պատասխանները։

«Հետքը» նամակ է ստացել Վարդենիսի շրջանի պայմանագրային ծառայողներից, որոնք տեղեկացնում են, որ վերջին ամիսներին պայմանագրային զինծառայողների աշխատավարձը 180.000 դրամից դարձել է 110.000 դրամ: Այս նվազեցումը պաշտոնապես չի մեկնաբանվել զինծառայողների համար: Նամակագիրները պնդում են, որ աշխատավարձի իջեցում տեղի է ունեցել միայն Վարդենիսի զորամասում, մյուս մարզերում աշխատավարձերը պահպանվել են նույն չափով: Սեյրան Օհանյանին խնդրում ենք պարզաբանել այս տեղեկությունը եւ հիմնավորումներ ներկայացնել: