Ըստ ՀՀ ազգային վիճակագրական ծառայության (ՀՀ ԱՎԾ)՝  Հայաստանում տնտեսական ակտիվության աճի տեմպերն արագացել են։ ԱՎԾ-ի այս տարվա հունվար-հունիսի օպերատիվ ամփոփ հրապարակումից տեղեկանում ենք, որ 2015թ. հունվար-հունիսին ՀՀ տնտեսական ակտիվության ցուցանիշի (ՏԱՑ) աճը նախորդ տարվա նույն ժամանակահատվածի համեմատ կազմել է 3,8%։ Իսկ ամսական ցուցանիշը՝ հունիսը մայիսի նկատմամբ, աճել է 15,8%-ով։  Տարեսկզբից ունենք հետևյալ պատկերը.

2015թ. հունվարին ՏԱՑ-ը 2014թ. հունվարի համեմատ աճել է 1,3%-ով

Հունվար-փետրվարին  2014թ. հունվար- փետրվարի համեմատ՝ 2,5%-ով

Հունվար-մարտին  2014թ. հունվար-մարտի համեմատ` 2,5%-ով

Հունվար-ապրիլին  2014թ. հունվար-ապրիլի համեմատ` 2,7%-ով

Հունվար-մայիսին 2014թ հունվար-մայիսի համեմատ՝  2,7%-ով

Այս տարվա առաջին կիսամյակում աճ է արձանագրվել արդյունաբերության, գյուղատնտեսության, շինարարության, ծառայությունների ոլորտում։ Անկում է գրանցել միայն առևտրի շրջանառությունը։

Այսպիսով, 2015-ի հունվար-հունիսին, 2014-ի նույն ժամանակահատվածի համեմատ, Հայաստանում արդյունաբերության արտադրանքի ծավալը, ըստ ՀՀ ԱՎԾ-ի, ավելացել է  5,1%-ով՝ կազմելով 613,639 մլրդ դրամ։

Գյուղատնտեսության ոլորտում արձանագրվել է 14,5% աճ։ Նշված ժամանակահատվածում գյուղատնտեսության համախառն արտադրանքի ծավալը կազմել է 235,551 մլրդ դրամ։

Փոքր է շինարարության ոլորտում գրանցված աճը՝  0,6%։ Հունվար-հունիսին շինարարության ծավալը կազմել է 134,914 մլրդ դրամը։

Աճ է գրանցել նաև ծառայությունների ոլորտը՝ 3,3%։ Ծառայությունների ծավալն (առանց առևտրի) առաջին կիսամյակում կազմել է 537,899 մլրդ դրամ։

Փաստորեն, միակ ոլորտը, որը անկում է գրանցել առաջին կիսամյակի տվյալներով, առևտրաշրջանառությունն է։ Այս տարվա հունվար-մայիսին, նախորդ տարվա նույն ամիսների համեմատ, այն նվազել է  8,2%-ով։ Առևտրի շրջանառության ընդհանուր ծավալը կազմել է 973,735 մլն դրամ։

Փաստորեն, Հայաստանում, ըստ ՀՀ ԱՎԾ-ի, արդեն քանի ամիս է շարունակվում է նույն պատկերը՝ տնտեսությունն աճում է, իսկ առևտրաշրջանառությունը անկում ապրում։ Այլ խոսքով՝ մարդկանց գնողունակությունը նվազում է տնտեսության աճի ֆոնին։ Այս հակասական հարցերին անդրադարձել ենք ավելի վաղ։