Անվանի բևեռախույզ, գիտնական, հասարակական գործիչ ու հումանիստ, հայ ժողովրդի մեծ բարեկամ Ֆրիտյոֆ Նանսենի ծննդյան 150-ամյակին նվիրված՝ Հայաստանի կառավարության որոշմամբ ստեղծվել է հոբելյանական հանձնաժողով՝ փոխվարչապետ Ա. Գևորգյանի նախագահությամբ:

Կազմվել և հաստատվել է հոբելյանական միջոցառումների ծրագիր, որի շրջանակում իրականացվել են մի շարք միջոցառումներ, այդ թվում պետական պատվերով թողարկվել է «Ֆրիտյոֆ Նանսեն՝ աշխարհի խիղճը» փաստավավերագրական ֆիլմը (ռեժիսոր՝ Էդ. Տեր-Սահակյան, DVD տարբերակով), հրատարակվել է Ֆ. Բախչինյանի «Նանսենը և Հայաստանը» ուսումնասիրությունը:

ՀՀ մշակույթի նախարարության տեղեկացմամբ՝ Ֆրիտյոֆ Նանսենի ծննդյան 150-ամյակին նվիրված հոբելյանական միջոցառումները կեզրափակվեն նոյեմբերի 9-ին:

ՀՀ ԱԳՆ-ում տեղի կունենա Նանսենին նվիրված նամականիշի մարում: Աբովյան-Մոսկովյան փողոցների հատման մասում կտեղադրվի մեծ հումանիստի հուշարձանը: Ալ. Սպենդիարյանի անվան օպերայի և բալետի ազգային ակադեմիական թատրոնի նախասրահում կբացվի Նանսենի կյանքին և գործունեությանը նվիրված լուսանկարների ու գրքերի ցուցահանդես:

Ալ. Սպենդիարյանի անվան օպերայի և բալետի ազգային ակադեմիական թատրոնում տեղի կունենա Նանսենի 150-ամյակին նվիրված հոբելյանական երեկո, որի ընթացքում թատրոնի սիմֆոնիկ նվագախմբի հետ հանդես կգան նորվեգացի դիրիժոր Թերջե Միկելսոնը և մենակատար Թորմոդ Ասգարդը (շեփոր): Համերգը կկազմակերպվի Նորվեգիայում ՀՀ դեսպանության հետ համատեղ՝ Նորվեգիայի արտգործնախարար Յոնաս Գահր Սթորի Հայաստան այցի շրջանակներում: