Երեկ Իրանում Հայաստանի դեսպան Արտաշես Թումանյանը հանդիպում է ունեցել ԻԻՀ ֆինանսների և էկոնոմիկայի նախարարի տեղակալ, Իրանի ներդրումային, տնտեսական և տեխնիկական աջակցման կազմակերպության նախագահ Մոհամմադ Խազայիի և արդյունաբերության, հանքերի և առևտրի նախարարի տեղակալ, առևտրի զարգացման կազմակերպության նախագահ Վալիալլահ Աֆխամիի հետ: Այս մասին տեղեկացնում է ՀՀ արտաքին գործերի նախարարությունը: 

Զրույցի ընթացքում դեսպան Թումանյանն առանձնացրել է երկու հանգամանք երկկողմ առևտրատնտեսական հարաբերությունների հետագա զարգացման համար` երկկողմ ապրանքաշրջանառության ակտիվացման նպատակով առևտրի ռեժիմների վերանայման նշանակությունը և փոխադարձ ներդրումներին պետական աջակցության կարևորությունը՝ հաշվի առնելով Իրանի միջուկային ծրագրի շուրջ ձեռք բերված համաձայնության և Հայաստանի` ԵՏՄ անդամակցության հանգամանքները: 

Իր հերթին փոխնախարար Աֆխամին նշել է, որ ստեղծված նոր պայմաններում Իրանը շահագրգռված է զարգացնելու իր տնտեսական հարաբերությունները` առաջին հերթին հարևան երկրների հետ: 

Հանդիպման ընթացքում կողմերը մտքեր են փոխանակել երկկողմ առևտրա-տնտեսական համագործակցության խորացման նպատակով ձեռնարկվելիք քայլերի վերաբերյալ: