ՀՀ հանրային ծառայությունները կարգավորող հանձնաժողովն իր ս.թ. սեպտեմբերի 14-ի նիստում քննարկել է «ՀայՌուսգազարդ» ՓԲԸ-ի նկատմամբ տուգանք կիրառելու հարցը: Ավելին` ոչ միայն քննարկել է, այլև, հիմք ընդունելով «Էներգետիկայի մասին» ՀՀ օրենքի 42-րդ հոդվածը, հանձնաժողովը որոշել է «Բնական գազի մատակարարման և օգտագործման կանոնների» 2.8 կետի պահանջի խախտման համար 5 մլն դրամի չափով տուգանք կիրառել ընկերության նկատմամբ:

Որքան էլ հակված չլինես սենսացիա փնտրել կատարվածում, այնուամենայնիվ «ՀայՌուսգազարդ» ընկերությանը տուգանելու արտառոց փաստն արդեն իսկ խոսուն է ու կարծես թե հուշում է քաղաքական վերաբերմունքի փոփոխության մասին: Իհարկե, նկատի չունենք սոսկ այն, որ հանձնաժողովի հիշյալ որոշումը գործընթացի չերևացող մասում, ըստ էության, խփում է ոչ վաղ անցյալում հիշյալ ընկերության վարչության նախագահ և գլխավոր տնօրեն Կարեն Կարապետյանին, որին Երևանի քաղաքապետ դառնալուց հետո էլ «ՀայՌուսգազարդում» համարում էին իրենց փաստացի ղեկավարը: Համենայն դեպս, շատերին է թերևս հայտնի, որ ընկերության ներկայիս վարչության նախագահ-գլխավոր տնօրեն Վարդան Հարությունյանը համարվում է Կ. Կարապետյանի ընկերը, մտերիմը կամ հովանավորյալը:

Վերոնշյալ ենթադրության հիմքը նաև այն փաստը չէ միայն, որ տուգանքի որոշումից և հասարակությանն անհայտ ինչ-ինչ զարգացումներից կարճ ժամանակ անց Կ. Կարապետյանը, հավանաբար արագորեն հասկանալով, որ Հայաստանում քամիները սկսել են փչել ոչ ի նպաստ իրեն կամ այն ուժերի, որոնց ներկայացնում է ինքը, հրաժարական ներկայացրեց Երևանի քաղաքապետի պաշտոնից: Իհարկե, սոսկ վերոնշյալի հիման վրա նման ենթադրություն կատարելը պարզապես անլուրջ կլիներ, սակայն...