«Անավարտ առանձնատունը անվտանգ չէ ոչ միայն իր տանիքով անցնող գազատարի, այլև այնտեղ գործունեություն ծավալող մարմնավաճառների պատճառով»
Երևանի ավագանու «Բարև Երևան» խմբակցության անդամ Անահիտ Բախշյանը հետևյալ նամակով դիմել է քաղաքապետ Տարոն Մարգարյանին.
«Ինձ են դիմել Երևանի Շենգավիթ վարչական շրջանի Ներքին Չարբախի 7-րդ փողոցի բնակիչներն այն մասին, որ այդ փողոցի 13/7 հասցեում կառուցվում է մի առանձնատուն, որի սեփականատեր Ռոբերտ Քոչարյանը(ոչ 2-րդ նախագահը) չի պահպանում փողոցի գազի մատակարարման անվտանգության կանոնները:
Մասնավորապես, առանձնատունը կառուցվում է փողոցը մատակարարող բնական գազի խողովակներին բառացիորեն կպած ու նույնիսկ անցնում է այդ առանձնատան տանիքի միջով: Ավելին գազի ԳԵՐՊ-ի և առանձնատան միջև հեռավորությունը կարելի է չափել սանտիմետրերով: Գազպրոմ Արմենիայի Շենգավիթ մասնաճյուղի ղեկավարությունը նույնպես լուրջ խնդրի առաջ է կանգնել, որովհետև սեփականատերը հայտարարում է, որ իր դեմ խաղ չկա:
Չնայած շինարարությունն անավարտ է, սակայն, ըստ բնակիչների նամակի, տարածքում սեփականատիրոջ թույլտվությամբ գործունեություն են ծավալում մարմնավաճառները: Խնդրում եմ ստուգել այս խայտառակ երևույթի մասին բնակիչների ահազանգը:: Խնդրում եմ պարզաբանել, թե արդյո՞ք օրինական է այդ կառուցապատումը, Գազպրոմ Արմենիայի Շենգավիթ մասնաճյուղի թույտվությունը կա՞, եթե այո, ապա խնդրում եմ տրամադրել շինթույլտվության ու Գազպրոմ Արմենիայի Շենգավիթ մասնաճյուղի թույտվության պատճեները»:
Մեկնաբանել