Վասիլ Ստուսի հիշատակին.Ռազմիկ Մարկոսյան
Հիշիր, որ ընկնելիս աղոթք պիտի ասես:
Վ. Ստուս
30 տարի առաջ այս օրը Ռուսաստանի Պերմի մարզի Կուչինո ավանում տեղակայված ԳՈՒԼԱԳ-ի մահվան ճամբարի մենախցում, 47 տարեկան հասակում, ավարտվեց ուկրաինացի բանաստեղծ, խորհրդային տարիների այլախոհ, այժմ` Ուկրաինայի ազգային հերոս Վասիլ Ստուսի կյանք-նահատակությունը: Զարմանալի զուգադիպությամբ` նրա քաղաքական գործունեությունը սկսվել էր 20 տարի առաջ նույն օրը` Կիևի «Ուկրաինա» կինոթատրոնում Սերգեյ Փարաջանովի «Մոռացված նախնիների ստվերները» ֆիլմի պրեմիերայի ժամանակ կազմակերպված միտինգին ունեցած մասնակցությամբ: Այդ օրը ի պաշտպանություն կալանավորված վաթսունականների ելույթը նրա առաջին քաղաքական քայլն էր ընդդեմ պետական համակարգի ապօրինի գործունեության: Ստուսի կյանքը երկու զուգահեռ ռելսերի` քաղաքականության ու պոեզիայի վրա ընթացող գնացք էր:
1965-ին Ստուսը փորձում է հրատարակել իր առաջին`«Ջրապտույտ» գիրքը: Բայց հեղինակի գաղափարա-գեղարվեստական չափանիշներն ու քաղաքացիական դիրքորոշումը հրատարակիչներին չեն բավարարում: Հաջորդ ժողովածուն`«Ձմեռային ծառերը», նույնպես մնում է հրատարակչությունում: 1970-ին այն լույս է տեսնում Բելգիայում, ինչից հետո Ստուսը վերջնականապես դառնում է համակարգի հալածյալը:
1972-ին Ստուսը ձերբակալվում է հակախորհրդային ագիտացիա և պրոպագանդա վարելու մեղադրանքով: Մեղսագրման համար հիմք էին ծառայում նրա 14 բանաստեղծություններն ու 10 իրավապաշտպանական և գրականագիտական հոդվածները: Դրանց մեջ էր նաև Պավել Տիչինայի մասին գրված «Դարաշրջանի ֆենոմենը» էսսեն:
1979-ի օգոստոսին վերադառնում է Կիև: Ելույթ է ունենում ի պաշտպանություն ՈւՀԽ (Ուկրաինայի Հելսինկյան խումբ) բռնադատված անդամների:
«Կիևում իմացա, որ Հելսինկյան խմբին մոտ կանգնածներին հալածում են ամենաստոր ձևով: Համենայն դեպս, այդպես էին դատել Օվսեենկոյին, Գորբալին, Լիտվինին, հետո այդպես պատժեցին Չերնովիլին ու Ռազումնիին: Այդպիսի Կիև ես չէի ուզում: Տեսնելով, որ խումբը փաստորեն մնացել է բախտի քմահաճույքին, ես անդամակցեցի նրան: Այլ կերպ չէի կարող վարվել: Եթե կյանքս խլված է ինձնից, փշրանքների կարիք չեմ զգում… Հոգեբանորեն ընկալում էի, որ բանտի դռներն արդեն բացված են ինձ համար, որ մի քանի օրից դրանք իմ հետևից կփակվեն, ու կփակվեն երկար ժամանակով: Բայց ի՞նչ կարող էի անել: Ուկրաինացիներին արտասահման գնալ չէին թույլատրում, թեև սահմանն անցնելու ցանկություն էլ չունեի. իսկ ո՞վ պիտի այստեղ` Մեծ Ուկրաինայում, ընդվզման ու բողոքի ձայն բարձրացներ: Դա ճակատագիր է, իսկ ճակատագիրը չեն ընտրում: Այն ընդունում են ինչպես որ կա: Իսկ թե չընդունենք էլ, ինքը բռնությամբ կընտրի մեզ… Բայց ես չեմ պատրաստվում գլուխ խոնարհել` անկախ ամեն ինչից: Իմ թիկունքին իմ Ուկրաինան է, իմ ճնշված ժողովուրդը, որի պատիվը ես պիտի պաշտպանեմ մինչ ի մահ»:
Իսկ 1975-ին՝ մահվանից տասը տարի առաջ պոետը գրում էր. «Հերոսության բոլոր հնարավոր տեսակներից մեր պայմաններում գոյություն ունի միայն մեկը՝ նահատակվելու, պարտադրաբար զոհաբերվելու հերոսությունը: Այս երկրի համար ցմահ խայտառակություն կլինի այն, որ մեզ խաչին գամեցին ոչ թե ինչ-որ արմատական հասարակական դիրքորոշման, այլ ինքնասիրության զգացում, մարդկային ու ազգային արժանապատվություն ունենալու համար»:
1980-ին Ստուսը Կիևի մարզային դատարանի կողմից դատապարտվում է 10 տարի հատուկ ռեժիմի կալանքի և 5 տարի աքսորի: Հայտարարվում է հատուկ վտանգավորության կրկնահանցագործ: Ի պաշտպանություն Ստուսի` Մադրիդյան համաժողովի մասնակիցներին է դիմում ակադեմիկոս Անդրեյ Սախարովը:
1983-ին Ստուսին հաջողվում է լիտվացի Գայաուսկաս ամուսինների միջոցով բանտից դուրս հանել իր «Ճամբարային տետրից» վերնագրով գրառությունը: Դրա հրապարակումը Արևմուտքում, ինչպես նաև Ստուսի ստեղծագործությունները Նոբելյան մրցանակի ներկայացնելու կապակցությամբ միջոցառումները պատճառ են հանդիսանում, որ Ստուսի նկատմամբ ճնշումը մեծանա:
1985-ի օգոստոսի 28-ին Ստուսին հերթական անգամ անհիմն մեղադրանքով պատժախուց են նետում, որտեղ նա անժամկետ հացադուլ է հայտարարում: 1985-ի սեպտեմբերի 3-ի լույս 4-ի գիշերը նա մահանում է:
Ստուսի մահին հաջորդում է նրա արդարացումը` 1990-ին:
1993-ին Ստուսի գրական ժառանգությունն արժանացել է Տարաս Շևչենկոյի անվան պետական մրցանակի: 1994-1999-ին ինը գրքով լույս է տեսել Ստուսի ստեղծագործությունների վեցհատորյա ժողովածուն: 1998-ին հետմահու պարգևատրվել է Յարոսլավ Մուդրիի շքանշանով: 2005-ին Ուկրաինայի ազգային հերոսի կոչում է ստացել:
Ստուսը հայ քաղբանտարկյալների սրտակից ընկերն էր, Ազգային Միացյալ Կուսակցության համակիր անդամ: Մեր` հայ այլախոհներիս` Հայաստանի պատմական անցյալից սկիզբ առած ու պատմականից քաղաքականի վերածված անարդարությունները ծանոթ էին նրան ու համակարգի հետ իր սեփական կռվի մասն էին կազմում:
«Պիտի ասեմ, որ բոլոր այն հայերը, որոնք ինձ հետ աղ ու հաց են կիսել (Պարույր Հայրիկյանը, Ռազմիկ Մարկոսյանը), վեր են ամեն տեսակ գովասանքի խոսքից: Ես նրանց երախտապարտ եմ այն բանի համար, որ իմ ընկերն են եղել: Խնդրում եմ, ինձ տեղյակ պահեք` ինչպես են Պարույրն ու Ռազմիկը: Ուզում եմ իմանալ` ինչպես են զգում իրենց: Ռազմիկին խոստացել են, որ Պարույրն իր հետ կլինի: Բայց որտե՞ղ: Նրանց տեղն այս տարի կարող է շատ անկանխատեսելի լինել: Խնդրում եմ, նրանց իմ ջերմ ողջույններն ուղարկեք»: Թող նրանք` Ռազմիկն ու Պարույրը, իմանան, որ ես առաջվա պես սիրում եմ իրենց ու երախտապարտ եմ երկար ամիսների ընկերության ու համատեղ պայքարի համար»:
«Վերջերս գրել եմ Ռազմիկին ու Պարույրին: Ռազմիկից նամակ ստացա: Նրան երկուսն ուղարկեցի: Ի դեպ, չեկիստն ասում էր, որ հայերի մասին ինչ-որ հոդված է լույս տեսել, որի մեջ իմ ազգանունն էլ կա: Ասաց` հոդվածում խոսվում է իմ ոտքերի, ձեռքերի մասին: Մոտը պատճեններ կային, որոնք հրաժարվեցի կարդալ»:
Սրանք պատառիկներ են Ստուսի` բանտից գրված նամակներից:
Ընդհանուր ցավը հզոր մերան է, և մեր` խորհրդային քաղբանտարկյալներիս համար ռեժիմի կամայականություններից ծնված ցավն ու մեր ազգային ինքնության պահպանման ձգտումը գրեթե նույնացրել էին մեզ: Մեր պայքարը աշխարհի քաղաքակիրթ հանրությանը վկայում էր մեծապետական բռնատիրության ու հետևողական ապազգայնացման հնարավոր պարտելիությունը: Եվ այդ պայքարի առաջատար մահապարտներից մեկը ուկրաինացի պոետ Վասիլ Ստուսն էր:
Շուտով առաջին անգամ հայերեն թարգմանությամբ կներկայացվի Ստուսի բանաստեղծությունների ժողովածուն:
Ստորև ներկայացնում ենք ժողովածուի բանաստեղծություններից:
Վասիլ Ստուս
* * *
Բարև քեզ, բարև, թխաչյա իմ տող,
Իմ անքնության քույրը լինես թող,
Կասեցրու նրան, ակնթարթ իմ վեհ,
Ափերիս համար աղոթքն է պատեհ:
Կապույտ աղավնի, ցավիս՝ մեծ պատիվ,
Երեկո է արդ, փետուրդ է խռիվ,
լսելի ես դու, քան երևելի,
դրոշմ առավել, այլ ոչ՝ թևելի:
Բարբառիր, իմ բառ, դու հասուն իմ ցավ,
Եվ երբ քո մասին շշնջամ՝ «հարեավ»,
փրկիր ինձ ծանր այս բեռից անգիր,
Ու խնդությունից դու նույնպես փրկիր:
Քանի ծաղկում են ափերս կլոր,
Տերև է տալիս սիրտս շուրջբոլոր,
Քանի դեռ խոհս երկար է քանց զանգ,
Զանգի պես կլոր՝ սրտիս ամեն հանգ,
Դու սափորի պես իմ ներսը լցրու
Մի անհուն սիրով ու հույսով հլու:
Եվ ըղձանքիս սուրբ ծաղկանց հատուցում՝
Իմ այս տողերի տքնանքը վերցրու:
* * *
Հանգիստ տուր ինձ, տեր:
Փայլն այս խաբուսիկ, հոգու ինքնազավթումը,
Սոսկ նմանակում են նենգ, որ խաթարում են
Մեղքի ու մարդկայնության տարանջատումը:
Ծարավն այս կիսաիրերի ու կիսամարդկանց
Մարած աշխարհում, մեռած հիրավի,
Այնպես անտանելի է ապրող մարդու համար,
Եվ ինքնալլկում է ճիչը կեղեքված այս արևի:
Հանգիստ տուր ինձ, տեր:
Վանիր իմ հոգուց տենչանքը նոր արարքների:
Տուր ամենակարող մահ, որ ես խաղաղվեմ,
Որ հանդարտվի հոգիս ու հասկանամ, որ
գիտակցելով ենք մենք այս ճամփան անցել,
Սագի պես ջուրը մտել, դուրս ենք եկել չոր:
Հանգիստ տուր ինձ, տեր:
Որ կանգ առնեմ ես, որ բաժան ճամփաների վկան
Ինքնավերադարձը լինի: Եվ տուր սահմանն իրական
Կյանքի ու մահի, ցերեկվա ու գիշերների գաղջ,
Ստի ու ճշմարտության միջև, բայց նախ և առաջ
Հանգիստ տուր ինձ, տեր:
Խաղաղություն հոգուս, չխեղվելու հնար: Տեր,
Մարդկանց այս երկրին ուշադրություն դարձրու,
Դուրս է եկել նա իր ուղեծրից, ու շատ է տարօրինակ
Երկիր մոլորակի առաջընթացն այս մահացու:
Շատ է սեղմված համբերությունը զսպանակի:
Կորչում են հոգիներն ինքնասառեցված,
Իսկ դուք հապա նայեք այս մարդակապկին՝
Բերանքսիվայր ահա սառույցին ընկած,
Փշոտ լեզուն այնպես ծիծաղելի կախած,
Նա երկու թաթով իր մորթն է սանրում արժանի
Ու համբերատար սպասում իր դարաշրջանին:
Երկրի վրա հոգու համար շատ է քիչ տեղը,
Այս մոլորակի վրա հոգու տեղը շատ նեղ է,
Ապրելն այստեղ մեջք ծռելն է, ու սիրտ է պայթում
Ինքնավսեմացումի այս որոգայթում:
Հանգիստ տուր ինձ, տեր:
Վերջապես խաղաղվել է հարթությունը
Այս լողացող-սահող անիմաստության:
Ծածանվում է ծովը հալչող դառնությունների
Ու մեզ ահաբեկում, վախեցնում է էլի
Թե երկար կսպասենք մենք մահվանն օրհնյալ,
Թե կկրենք այս բեռն այստեղ մինչև վերջ:
Որ հեռու է ինքնանհետացումը կատարյալ
Հավերժող անաղարտն այն անէության մեջ:
Կամ հանգիստ թող ինձ, կամ հանգիստ տուր, տեր:
* * *
Թե չլինեիր, ձմեռն ինձ համար
Մի սառած փողոց կլիներ երկար,
Անծայր մի փողոց կլիներ մահու,
Կյանքն էլ կսառչեր, թե չլինեիր դու:
Թե չիմանայի, որ անձայնության
Ու խավարի մեջ այս սև մթության
Չկա քո մոմը, որ վառվում է հեզ,
Գուցե խենթացած կլինեի ես:
Օրերս ասես մոռանում են ինձ,
Իսկ ես նայում եմ այս պատուհանից,
Ու տենում եմ ես աչքերը քո նուշ,
Ուկրաինա, Մայր, դու Կին իմ անուշ:
Թե չլինեիր, ես ցած կընկնեի,
Ես հնձվածի պես կտապալվեի,
Բայց պարզել ես դու քո թևերն ահա
Իմ միայնության պատկերի վրա,
Եկել ես այստեղ՝ շշնջաս էլի.
-Դու ես որդին իմ, այրն իմ սիրելի:
* * *
Ես ճանաչում եմ այն, ինչ անդին է մահից.
Գաղտնի արարքների ուժը անհուն,
Եվ ամբողջ խավարը, որ գալիս է երկնից,
Եվ կավը այս երկրի երերուն:
Դժվար է ապրել այդ գիտությանը
Ապավինելով դատարկ տունդ փտած,
Դժվար է նաև այդ զորությանը
Հենել քո տանիքի ծածկը ճկված:
Նեխումն ամեն բան իր տակ է վերցրել,
Պատել է քեզ, հաղթել ու մեռցրել:
Եվ դու էլ երբեք չես կենդանացնի
Սիրտը քո փխրուն ու դյուրահավատ,
Ամենն իր հանգույն: Աշխարհն էլ կանցնի,
Ուր զորացել է հոգիդ լավ թե վատ:
Դա է գիտելիքն այս աշխարհի գոս,
Եվ ծանր հատուցումը քո, հերետիկո՛ս:
Բայց նայիր, ահա, մարդասպանի՛դ տես,
Ձեռքն է իր մեկնում նա՝ ժպտադիմակ,
Գոհ ու երջանիկ կյանք է մաղթում քեզ՝
Թաքուն պահած ոխն իր հանց դանակ:
* * *
Դու նախանձիր ինձ, նախանձիր, Բալզակ,
Որ փարաջա ունեմ, նստել եմ մենակ:
Շուրջս լուռ ու մութ է, ու ես վհուկի պես
աչքերս չռած՝ նայում եմ աշտարակներին,
որ խենթերի պես ցրված են մին-մին.
Ի՜նչ երանություն այս տարաժամին:
Բայց հենց նույն պահին սթափվում եմ հանկարծ,
Ու պատրանքներս՝ քաղցր, վտարված
Ասում են՝ լսիր, ինչո՞վ ես տարված.
Տրտում մի հորիզոն անհույսի ներքո՝
Ահա քո հայրենին ու բաժինը քո:
* * *
Ռազմիկ Մարկոսյանին
Ու պարզեց ձեռքն իր Աստված,
Զատկական աստղեր ցանեց,
Անթիվ աստղերից անդին
Նա ողկույզ մատուցանեց:
Օծվեց կապույտը երկնի
Տրտում ոսկով հուրհրան,
Լույս իջավ վերից հանկարծ,
Հոգիս մարմնիցս տարան:
Ձնաբուք հեծկլտացող,
Մերկ փշալարեր սառած:
Աշխարհը լույս լինի թող,
Փառավորի թող Աստված:
* * *
Տեր, տուր, մեզ այսօ’ր: Ինչ էլ որ լինի,
Այսօ’ր տուր մեզ, Տեր: Վաղն ուշ կլինի:
Մարում են խարույկներն ուկրաինական,
Մարում է երկրում իմ ամենը, ինչ կա:
Իմ ճամփան է մարում անջուր ու չոր,
Մարում է ծարավից հոգին իմ տոչոր:
Թե Աստծո աչքը չի տեսնելու մեզ,
Դե, ուրեմն, ցավ, մոլեգնիր հրկեզ:
1969, մարտ
* * *
Ինչ լավ է, որ ես չեմ վախենում մահից,
Որ վաղուց եմ ընտրել ծանր խաչ,
Որ չեմ խոնարհվում դատավորների
Ու ոչ էլ անհայտ բախտի առաջ:
Որ ապրել եմ, սիրել, որ չեն պղծել ինձ
Զղջում ու նզովք, տրտունջ ու թախիծ:
Սպասիր ինձ, կգամ ես դեռ, իմ ժողովուրդ,
Կանցնեմ մահվան միջով, կգամ դեպի կյանք,
Ես շիտակ կնայեմ աչքերիդ մաքուր,
Դու աչքերիս մեջ կտեսնես բերկրանք:
Կասեմ որդիդ եմ ու ծունկի կգամ,
Կփարվեմ հողիդ, հողդ կդառնամ:
Առաջին լուսանկարում` Վասիլ Օվսիենկոն և Ռազմիկ Մարկոսյանը(ձախից)
Մեկնաբանություններ (1)
Մեկնաբանել