Օգոստոսի 31-ին ՀՀ Կառավարությունը կայացրեց որոշում էլեկտրական էներգիայի սակագնի մեղմման միջոցառման մասին: Դրանով, մասնավորապես, նախատեսվում է սուբսիդավորել էլեկտրաէներգիայի 6,93 դրամով թանկացած սակագինը բնակիչ-բաժանորդների համար ամբողջությամբ և ամսական 0.38 կՎ լարմամբ 500 կՎտժ-ից ոչ ավել սպառող իրավաբանական անձանց համար՝ մասնակի:

Այլ կերպ ասած, ամսական առավելագույնը 1732 ՀՀ դրամի չափով սուբսիդիա կստանան միայն այն կազմակերպությունները, որոնց էլեկտրաէներգիայի ամսական ծախսը չի գերազանցի շուրջ 20 հազար ՀՀ դրամը:

Կառավարությունում չգիտեն

Պատասխանելով «Իրազեկ քաղաքացիների միավորման» հարցումներին, ՀՀ ֆինանսների նախարարությունից հայտնեցին, որ իրենց հայտնի չէ, թե որքա՞ն է պետության վրա նստելու այդ սուբսիդավորումը և առաջարկեցին տեղեկատվությունը ստանալ էներգետիկայի նախարարությունից:

Իսկ ահա էներգետիկայի և բնական պաշարների նախարար Երվանդ Զախարյանը մեր հարցմանը պատասխանեց, որ իրեն էլ հայտնի չէ, թե որքա՞ն գումար է ծախսվելու կառավարության այդ որոշումը:

Այսինքն, գործադիրը կայացրել է որոշում՝ առանց իմանալու, թե որքա՞ն է այն նստելու հարկատուների վրա:

15 միլիոն $

Ելնելով ստեղծված իրավիճակից, մենք հաշվարկեցինք, թե որքա՞ն է արժենալու այդ սուբսիդիան՝ ելնելով դրա տակ ընկնող բաժանորդների սպառման կանխատեսումից:

Այսպիսով, դատելով նախորդ տարվա տվյալներից, կես տարում Հայաստանում բնակիչ-բաժանորդները սպառում են 945-ից 965 միլիոն կՎտժ էլեկտրաէներգիա: Եվս 475-ից 490 միլիոն կՎտժ էլեկտրաէներգիա սպառում են 0.38 կՎ լարման տակ ընկնող իրավաբանական անձինք, ում միայն մի փոքր մասի էլեկտրաէներգիան է սուբսիդավորվելու (այն էլ՝ մասնակի)… Արդյունքում իրավաբանական անձանց սուբսիդավորված էլեկտրաէներգիայի քանակը (կիսամյակում) կազմելու է մոտ 70-ից 85 միլիոն կՎտժ:

Այսինքն, բավականին մեծ ճշտությամբ կարելի է ասել, որ 2015 թվականի օգոստոս-դեկտեմբեր ամիսներին սուբսիդիայի տակ է ընկնելու 1015-ից 1050 միլիոն կՎտժ: Այդ թիվը 6,93 դրամով բազմապատկելիս կստացվի, որ այս կես տարում հարակատուներիս հաշվին ՀԷՑ-ին կփոխանցվի 5,8-ից 6,1 միլիարդ դրամ, կամ, մոտ 12,5 միլիոն դոլար:

Ընդ որում, ինչպես նշվեց, այս սուբսիդիան չի ծածկում արդյունաբերական հիմնարկների սպառած էլեկտրաէներգիան և վերջիններս լուրջ խնդիրներ կունենան արտադրանքի մրցունակության հետ, քանի որ, Հայաստանում էլեկտրաէներգիայի սակագինն այժմ ամենաթանկն է ԱՊՀ տարածքում և շուրջ 2 անգամ ավելի թանկ է, քան ԵՏՄ տարածքի միջին սակագինը:

«Իրազեկ քաղաքացիների միավորում»