HY RU EN

Միջազգային շուկայում մետաղների գների անկման հետեւանքները Լոռիում արդեն զգում են

Լոռու մարզի հանքարդյունաբերության ոլորտի ճգնաժամային վիճակին վերաբերող «Հետքի» հարցերին պատասխանում է Լոռու մարզպետ Արթուր Նալբանդյանը։  

-Ինչ գնահատական կտաք Լոռու մարզի արդյունաբերության ներկա վիճակին:

-Մարզի արդյունաբերության վիճակն այս պահին այնքան էլ ոգևորող չէ` կապված համաշխարհային շուկայում մետաղի գների անկման հետ: Ճգնաժամի բացասական ազդեցությունն անմիջապես նկատվում է մարզի տնտեսության վրա: Արդեն շուրջ մեկ ամիս է՝ չի շահագործվում Ստեփանավանի «Սագամար» ՓԲԸ-ին պատկանող ոսկու հանքավարը: Այստեղ նաև հանքաքարի մեջ ոսկու պարունակությունն է կանխատեսվածից մի փոքր քիչ: Գործարանը շահութավետ չի կարողանում աշխատել և ընկերությունն իր 400 աշխատողներից հանքի և ֆաբրիկայի աշխատողներին 2/3-ով տուն է ուղարկել: Մնացածը բնականոն աշխատում են:

-Իսկ ինչ վիճակում են Ախթալայի ԼՀԿ-ն, «Թեղուտ» ՓԲԸ-ն և Ալավերդու պղնձաձուլական գործարանը:

-Նույն վիճակն այս ընկերություններում է տիրում: Ես վերջերս հանդիպեցի «Վալլեքս» խմբի ընկերությունների սեփականատիրոջ և Ալավերդու պղնձաձուլական գործարանի տնօրինության հետ: Գագիկ Արզումանյանը մեզ ներկայացրեց «Վալլեքս» խմբի մարզի տարածքի ընկերությունների վիճակը: Ասաց նաև, թե ինչ է սպասվում Ալավերդու պղնձաձուլական գործարանին: Արզումանյանի ասելով, եթե ճգնաժամն այս տեմպերով շարունակվի, ընկերությունը, պղնձաձուլական գործարանում, ըստ իրենց հաշվարկների, կարող է տարեկան 4-5 մլն դոլարի վնաս կրել: Սա, իհարկե, մեզ մտահոգում է, որովհետև լավերդու պղնձաձուլական գործարանում աշխատում են շուրջ 610 աշխատողներ: Գործարանի փակումը աղետալի կլինի  գործազրկության մեջ հայտնվող այս մարդկանց համար, քանի  որ այլընտրանքային աշխատատեղ մենք չենք  առաջարկում: Մենք «Էյ-Սի-Փի»-ի տնօրինության հետ  պայմանավորվածություն ձեռք բերեցինք և առայժմ բանակցում ենք, միգուցե «Թեղուտ» ՓԲԸ-ի հետ կապված իրենք գործարանում ինչ որ փոփոխություններ կատարեն, ասենք ընդլայնվի պղնձաձուլական գործարանի  մեխանիկական արտադրամասը, որտեղ աշխատանքի կտեղավորվեն կրճատվող աշխատողները:

-Մարդիկ խոսում են, որ «Թեղուտ» ՓԲԸ-ն  ևս նախատեսում է 400 աշխատատեղերի կրճատում: Տեղյա՞ կ եք այդ մասին:

-«Թեղուտ» ՓԲԸ-ում նույնպես պղնձի և մոլիբդենի  գների անկման հետ կապված լուրջ խնդիրներ կան: Բացի այդ՝ իմ տեղեկություններով, սեպտեմբերից «Թեղուտ» ՓԲԸ-ն լուրջ ֆինանսական խնդիրների առաջ է կանգնել` կապված վարկերի մարման հետ: Չեմ ուզում հավատալ, որ Թեղուտ ՓԲԸ-ն միանգամից 400 աշխատող կկրճատի, մտածում եմ, որ այդ կրճատումները կկատարվեն աստիճանաբար: Մենք պետք է փորձենք կրճատվողներին այլընտրանքային աշխատանք  առաջարկել:

- Մի կողմից հանքարդյունաբերությունը իրեն չի արդարացնում, մյուս կողմից, մարզում, մասնավորապես Թումանյանի տարածաշրջանում լայն թափով արդյունահնաման նպատակով երկրաբանական նոր ուսումնասիրություններ են  ընթանում: Ինչ է սպասվում այդ ուսումնասիրությունների դրական արդյունքերի  դեպքում:

-Նախ ուսումնասիրություններ կատարել, դեռ չի նշանակում հանքը բացել: Բնական պաշարներն ուսումնասիրելուց  հետո  նոր որոշում կկայացվի` հանքը շահագործում են , թե `չէ:

-Դժբախտաբար, քննարկումներին հանքարդյունբերողները չեն թաքցնում` դրական ցուցանիշներ լինելու դեպքում, այդ  հանքերը  բացելու  իրենց  մտադրությունը: Դուք համաձայն  ե՞ք ուսումնասիրված բոլոր հանքերը  բացել:

-Բոլորը  չեմ կարծում,  որ  հնարավոր կլինի բացել, օրինակ Ֆիոլետովոյում ներդրողի  ցանկությունը մեծ  էր, բայց քանի  որ համայնքը դեմ էր, աշխատանքերը  դադարեցվեցին: Էնպես չի , որ բոլոր հանքերը կարող են  բացել, շատ կարևոր է համայնքի կարծիքը:

-Ծաղկաշատ համայնքի գյուղացիները  այս պահին դեմ են իրենց  մոտ լեռնահետախուզական աշխատանքեր կատարելու «Թեղուտ» ՓԲԸ-ի  առաջարկին:  Այս դեպքում, դուք կաջակցե՞ք  նրանց:

-Անկասկած, իհարկե: Ոչ միայն ես, նաև կառավարությունը կկանգնի այն  բնակիչների  կողքին, ովքեր  հիմնավոր պատճառներ  ունեն  հանքի շահագործմանը դեմ կանգնելուն:  Հանրային կարծիքը հարգելու օրինակ ունենք նաև  Թռչկանի մասով: Էնպես չի,  որ կառավարությունը աչք է փակում հանրային  կարծիքի  հարցում:

- Հաղպատ  համայնքում, որտեղ տուրիզմը մեծ  քայլերով զարգանում, նույնպես «Թեղուտ» ՓԲԸ- կողմից նախատեսվում է կատարել երկրաբանական  ուսումնասիրություններ: Կհամաձայնե՞ք Հաղպատում հանք շահագործելու  հետ:

 -Առաջին անգամ եմ լսում,  որ ինչ  որ մեկը  Հաղպատում փորձում  է հանք շահագործել:

-Հաղպատը նույնպես մտնում  է «Ծաղկաշատ-Ախետք»  հանքային  դաշտի մեջ:

-Եթե հանքարդյունաբերությունը պետք է խանգարի Հաղպատի զբոսաշրջության  զարգացման ձեռքբերումներին, բնականաբար մենք  ինքներս  կփորձենք ինչ որ  բանով  օգտակար լինել:

Համենայնդեպս ես Հաղպատի մասին  առաջին  անգամ լսեցի:

Տա Աստված որ մենք պղնձի և  ոսկու շատ  պաշարներ  ունենանք: Բայց դա չի  նշանակում, թե դրանք բոլորը պետք է բացել: