Կյանքի 75-րդ տարում վախճանվել է հայ մամուլի տեսաբան, ԵՊՀ Ժուռնալիստիկայի ֆակուլտետի մամուլի պատմության և տեսության ամբիոնի պրոֆեսոր, բանասիրական գիտությունների դոկտոր Լենդրուշ Արամի Ալոյանը։

Լ. Ալոյանը Ծնվել է 1941թ․, Վանաձորում։ 1958թ-ին ավարտել է տեղի թիվ 6 միջնակարգ դպրոցը։ 1960-62թթ․ ծառայել է խորհրդային բանակում։ 1962թ-ին ընդունվել է Երևանի պետական համալսարանի բանասիրական ֆակուլտետի ժուռնալիստիկայի բաժինը, որը 1966թ-ին ավարտել է գերազանցությամբ և աշխատանքի անցել «Սովետական դպրոց» թերթում։

1987թ-ից ԵՊՀ ժուռնալիստիկայի բաժնի, այնուհետև՝ ժուռնալիստիկայի ֆակուլտետի դասախոս, 1996-2008թթ․ ֆակուլտետի մամուլի պատմության և տեսության ամբիոնի վարիչն էր։ 1974թ-ին պաշտպանել է թեկնածուական, 1998թ․՝ դոկտորական ատենախոսություն։ 2000թ-ից պրոֆեսոր էր։ Հեղինակել է մենագրություններ, գիտական և հրապարակախոսական հոդվածներ։ Իր գիտական հետաքրքրությունների առանցքը 19-րդ դարավերջի և 20-րդ դարասկզբի հայ մամուլն էր, մասնավորաբար՝«Մշակ» լրագրի գործունեությունը հիմնադիր-խմբագիր Գր․ Արծրունու մահից հետո։

Երևանի պետական համալսարանի Ժուռնալիստիկայի ֆակուլտետը տեղեկացնում է, որ հոգեհանգիստը տեղի կունենա հոկտեմբերի 21-ին, ժամը 17:00-ից, Ազատության պողոտա, նրբանցք, շենք 2, բն. 71 հասցեում։ Հուղարկավորությունը՝ հոկտեմբերի 22-ին, ժամը 14:00-ին։