Լիլիթ Թադևոսյան

2016 թվականի պետական բյուջեով Մարդու իրավունքների պաշտպանի գրասենյակին կհատկացվի 256 միլիոն դրամ, որը 7 միլիոն դրամով ավելի է, քան անցյալ տարվա հատկացումը, և դա պայմանավորված է աշխատավարձերի բարձրացմամբ և էլետրաէներգիայի ծախսերով: Այն ներկայացրեց ՀՀ ֆինանսների փոխնախարար Պավել Սաֆարյանը:

ՀՀ մարդու իրավունքների պաշտպան Կարեն Անդրեասյանը չէր մասնակցում բյուջեի քննարկմանը, և նրա փոխարեն այնտեղ էր ՄԻՊ գրասենյակի աշխատակազմի ղեկավար Տիգրան Արեյանը: Պաշտպանի` քննարկմանը չմասնակցելն առաջացրեց պատգամավորների դժգոհությունը:

Պատգամավոր Ալիկ Արզումանյանն իր հարցն ուղղելով Տիգրան Արեյանին՝ ասաց, որ ինքը չի կասկածում նրա պրոֆեսիոնալիզմին, և վստահ է, որ տիրապետում է նյութին և պատրաստ է իրենց ցանկացած հարցի պատասխանել, բայց այս հարցը պարբերաբար հնչեցվում է դահլիճում, երբ գերատեսչության ղեկավարը չի մասնակցում:

«Մեր հանձանժողովը բամիցս ցուցաբերել է շատ բարյացակամ վերաբերմունք Մարդու իրավունքների պաշտպանի գրասենյակի նկատմամբ: Երկու տարի առաջ բյուջեի համար մենք միահամուռ հանդես եկանք և պարոն Սաֆարյանը համաձայնեց լրացուցիչ ֆինանսավորում ապահովել, և հաջորդ տարի դուք արդեն գոհ էիք այդ թվից: Եղել է միշտ հարգալից վերաբերմունք մեր հանձնաժողովի կողմից: Մեզ համար անընդունելի է, երբ գերատեսչության ղեկավարը չի գալիս: Լինում են բացառություններ, ինչպես արտաքին գործերի նախարարի պարագայում, որն ունի նախապես երկարաժամկետ պայմանավորվածությունների գրաֆիկ, որը խախտելը բարդ է լինում, բայց կոնկրետ ՄԻՊ-ը, որը Հայաստանում է գտնվում, պետք է մասնակցի»,- ասաց Ալիկ Արզումանյանը:

Նա ասաց` այստեղ իրենք ինստիտուտ են, անկախ մարմին երբևէ չի նշանակում, որ որևէ մեկի հետ չհամագործակցես:

«Սա օրիորդաց վարժարան չի, որ ինչ-ինչ բաներից նեղացվածություն լինի, և դեմարշներ կատարվեն: Խնդրում եմ հաղորդեք, որ սա առաջին դեպքը չի, մենք տարբեր գերատեսչություններին նույն հարցը տալիս ենք: Կնախընտրենք, որ այստեղ ներկայացնի բյուջեն: Ընդամենը տարին երկու անգամ է, մեկ անգամ էլ զեկույցով է հանդես գալիս: Այդ երեք անգամն այնպես արեք, որ չբացակայեք երկրից և առաջին դեմքի մակարդակով այստեղ լինեք»,- եզրափակեց Ալիկ Արզումանյանը:

Վերջինիս մտահոգություններին միացավ նաև ԱԺ Մարդու իրավունքների պաշտպանության 7 հանրային հարցերի մշտական հանձնաժողովի նախագահ Էլինար Վարդանյանը՝ նշելով, որ  ԱԺ-ն պահանջում է  պատշաճ վերաբերմունք բոլոր գերատեսչությունների կողմից: «Հարգանքն ԱԺ-ի նկատմամբ ենթադրում է նաև փոխադարձ հարգանք այդ գերատեսչությունների նկատմամբ»,- ասաց Էլինար Վարդանյանը:

Տիգրան Արեյանն էլ ասաց, որ քանի որ ֆինասատնտեսական, բյուջետային հարցեր էին քննարկվում, և դրա հետ կապված կառավարության հետ չունեին որևէ անհամաձայնություն, դրա համար էլ այդպիսի որոշում կայացվեց և իրենք միշտ հարգալից վերաբերմունք են ունեցել ԱԺ-ի նկատմամբ և հիմա էլ ակտիվ աշխատում են, և խնդրեց դա չորակել որպես անհարգալից վերաբերմունք:

Արձագանքելով՝ Ալիկ Արզումանյանն ասաց, որ այդ դեպքում հաշվապարհին ուղարկեին, ավելի լավ կլիներ:

Այնուհետև Տիգրան Արեյանին հարց ուղղեց ԱԺ ԲՀԿ խմբակցության ղեկավար Նաիրա Զոհրաբյանը, որն ասաց, որ իրեն դիմել են ցմահ ազատազրկվածների հարազատները, և կուզենար Արեյանի դիրքորոշումն իմանալ հարցի վերաբերյալ, քանի որ գործեր կան, որոնք դատական կարգով պարտադիր պետք է վերանայվեն, սակայն սայլը տեղից չի շարժվում: Բացի դա նա նշեց, որ միայն անցյալ շաբաթվա ընթացքում 13 նամակ են ստացել վաղաժամկետ ազատ արձակման այդ «չարաբաստիկ» հանձնաժողովի գործունեության վերաբերյալ:

«Բավարար չէ՝ մարդուն մի անգամ դատապարտում են, մի անգամ էլ նվաստացնում են՝ հույս տալով, որ մի դրական փոփոխություն կլինի: Այդ հանձնաժողովի գործունեությունը դարձել է պարզապես աղետ՝ այն կամ պետք է լուծարել, կամ պետք է վերանայել նրա գործունեությունը՝ այն գիր-ղուշի տարբերակով ում դիմումը կուզենա, կբավարարի, իսկ որեւէ դիմումի բավարարման մեջ որևէ տրամաբանություն չկա»,- ասաց Զոհրաբյանը:

Ի պատասխան Տիգրան Արեյանն ասաց, որ հարցը բյուջեի հետ կապ չունի, սակայն ասաց, որ երեկ Կարեն Անդրեասյանը եղել է ՔԿՀ-երում ու առաջիկայում հայտարարությամբ հանդես կգա:

Արձագանքելով՝ Նաիրաա Զոհրաբյանն ասաց, որ իրենք էլ են պարբերաբար հանդես գալիս տարբեր հայտարարություններով, սակայն ցանկանում են տեսնել որևէ լուծում:

«Մինչ օրս որևէ լուծում չի եղել: Մենք չե՞նք կարողանում ԱԺ ու օմբուդսմենի լիազորություններն օգտագործելով  հրավիերնեք հանձնաժողովի անդամներին քննարկման, միգուցե մեր ինտելեկտը չի հերիքում կամ այլ սկզբունք է դրված նրանց գործունեության հիմքում, որ հասկանանք՝ ինչ են անում»,- հավելեց Նաիրա Զոհրաբյանը: