Լիլիթ Թադևոսյան

ՀՀ 2016 թվականի պետական բյուջեի նախագծով գիտության, կրթության, մշակույթի, երիտասարդության և սպորտի ոլորտներին նախատեսված է հատկացնել 26,238.5 մլն դրամ, ինչը նախորդ տարվա համեմատ նվազել է: Նախորդ տարի այն կազմել էր 28,282.0 մլն դրամ:

Այդ մասին այսօր ԱԺ գիտության, կրթության, մշակույթի, երիտասարդության և սպորտի հարցերի ու Ֆինանսավարկային և բյուջետային հարցերի մշտական հանձնաժողովների համատեղ նիստում ասաց հիմնական զեկուցող, ՀՀ  ֆինանսների փոխնախարար Պավել Սաֆարյանը: 

Նրա խոսքով ՝ նվազումը պայմանավորված է «Հայոց ցեղասպանության 100-րդ տարելիցի միջոցառումների իրականացում» ծրագրի ավարտմամբ:

«Կրթության ոլորտին այս տարի կտդրամադրվի 131,939.4 մլն դրամ և ծախսերը 2015թ. պետական բյուջեի նկատմամբ աճել են 6,423.5 մլն դրամով կամ 5.1 տոկոսով: Հանրակրթության ոլորտին, որի գծով 2016 թվականին նախատեսվել է հատկացնել 76,702.4 մլն դրամ, կա ծախսերի աճ, որը նախորդ տարվա համեմատ կազմում է 2,319.6 մլն դրամ կամ: «Ներառական կրթություն» ծրագրի գծով նախատեսվել է 3108.2 մլն դրամ, Հատուկ կրթության և մասնագիտացված հանրակրթական ուսուցման գծով նախատեսվել է հատկացնել 5659.6 մլն դրամ»,-ասաց Սաֆարյանը:  

Փոխնախարարը նաև տեղեկացրեց, որ գիտության ոլորտի համար 2016 թվականի պետական բյուջեի նախագծով գիտությանը կհատկացվի շուրջ 14.313.8 մլն դրամ:

Իսկ հանգստի, մշակույթի և կրոնի բնագավառին 2016թ. պետական բյուջեի նախագծով հատկացումները կազմում են 26,238.5 մլն դրամ` 2015թ. 28,282.0 մլն դրամի դիմաց: Նվազումը դարձյալ պայմանավորված է «Հայոց ցեղասպանության 100-րդ տարելիցի միջոցառումների իրականացում» ծրագրի ավարտմամբ:

«Պետական կառավարման մարմինների պահպանման ծախսերը, ինչպես և 2015 թվականին, կազմում են 1,421.0 մլն դրամ: Հանգստի և սպորտի ծառայությունների համար նախատեսված է տրամադրել 1,838.5 մլն դրամի հատկացումներ: Մշակութային ծառայությունների համար 2016 թ. նախատեսված է 13,627.4 մլն դրամ հատկացնել, որը նախորդ տարվա համեմատ ավելի քիչ է, քանի որ 2015 թվականին  այն կազմում էր 15,539.8 մլն դրամ»,- ասաց փոխնախարարը:

Ինչ վերաբերում է ռադիո և հեռուստահաղորդումների հեռարձակման և հրատարակչական ծառայություններին հատկացվելիք գումարներին, Պավել Սաֆարյանն ասաց, որ այս տարի այդ ոլորտին կտրամադվի 8,631.5 մլն դրամ, իսկ  2015 թվականին տրամադրվել է 8,748.4 մլն դրամ:

«Հեռուստառադիոհաղորդումների գծով 2016 թվականին նախատեսված է  տրամադրել 7,107.9 մլն դրամ:  Հրատարակչությունների, խմբագրությունների գծով  այս տարի կհատկացվի 1,135.3 մլն դրամ: Տեղեկատվության ձեռքբերման գծով 2016 թվականին նախատեսված են 388.3 մլն դրամ հատկացումներ: Իսկ Կրոնական և հասարակական այլ ծառայությունների գծով 2016թ. նախատեսված է 1,123.1 մլն դրամ: Երիտասարդական ծրագրերի իրականացման համար 2016 թվականին նախատեսված է 827.4 մլն դրամ: Քաղաքական կուսակցություններին, հասարակական կազմակերպություններին, արhմիություններին, ազգային փոքրամասնություններին աջակցության նպատակով 2016 թվականին կհատկացվի   295.7 մլն դրամ, որը նախորդ տարվանից չի տարբերվում»,-հավելեց Պավել Սաֆարյանը: