Լիլիթ Թադևոսյան

Այսօր հրավիրված ԱԺ արտահերթ նիստում 70 կողմ, 14 դեմ եւ 19 ձեռնպահ ձայներով առաջին ընթերցմամբ ընդունվեցին «ՀՀ վարչատարածքային բաժանման մասին» ՀՀ օրենքում փոփոխություններ և լրացումներ կատարելու մասին» օրենքը և կից ներկայացված նախագծերի փաթեթը:

Մինչև քվեարկությունը վարման կարգի վերաբերյալ ձայն խնդրեց ՀԱԿ խմբակցության ղեկավար Լևոն Զուրաբյանն ու ասաց, որ օրինագիծը ներկայացված է Սահմանադրության պահանջների խախտումով, այսինքն՝ օրինագծին կցված չեն տվյալները հանրաքվեների մասին:

«Ես կոչ եմ անում բոլոր պատգամավորներին՝ քվեարկելուց առաջ ուշադիր լինել այս արդյունքների նկատմամբ, որովհետև եթե դուք ուշադիր ուսումնասիրեք, կտեսնեք, որ բնակչությունը, համայնքները դեմ են քվեարկել այս խոշորացմանը: Ես կոչ եմ անում հարգել համայնքների բնակիչների կամքը, ժոողվրդի կամքը»,- ասաց Զուրաբյանը:

Զուրաբյանին արձագանքելով՝ ԱԺ նախագահ Գալուստ Սահակյանն ասաց, որ կարծում է՝ քվեարկության արդյունքներն ըստ քննարկվող հարցի պարտադիր չէ, որ լինեին:

«Պարզապես, ձեր խնդրանքով ներկայացվել է, մի քանի անգամ կարդացինք նաև կարգը, այսինքն՝ խնդիրը ոչ թե վերաբերում էր քվեարկության արդյունքներին, այլ հիմնական նախագծին»,- ասաց Գալուստ Սահակյանը:

Հիշեցնենք, որ այս տարվա մայիսին Լոռու, Սյունիքի և Տավուշի մարզերի 22 համայնքներում անցկացվել էր տեղական հանրաքվե՝ համայնքների խոշորացման վերաբերյալ: Համաձայն այդ հանրաքվեի արդյունքների՝ բացառությամբ Սյունիքի մարզի ու Լոռու մարզի մի քանի գյուղի, բոլոր բնակավայրերում համայնքների խոշորացմանը դեմ են արտահայտվել:

ԱԺ 70 պատգամավոր կողմ քվեարկեց համայնքների խոշորացմանը, մինչդեռ բնակչության մեծ մասը հանրաքվեով ոչ էր ասել դրան