Լիլիթ Թադևոսյան

ԱԺ ՀԱԿ խմբակցության պատգամավոր Նիկոլ Փաշինյանը,  այսօր ելույթ ունենալով 2016թ. պետական բյուջեի նախագծի քննարկմանը, ասաց, որ դրա մասին երկու լուր ունի, մեկը՝ վատ, մեկը՝ լավ:

Վատ լուրը, Նիկոլ Փաշինյանի խոսքով, այն է, որ նախորդ տարվա համեմատությամբ բյուջեի եկամուտները շուրջ 8 մլրդ դրամով պակասել են, այսինքն՝ կենսաթոշակները, նպաստները բյուջետային հիմնարկների աշխատողների աշխատավարձները  չեն բարձրանա: Փաշինյանի հայտնած լավ լուրն այն է, որ պետական կառավարման մարմինների ծառայողական մեքենաների թիվը նախորդ տարվա համեմատ ավելացել է 83 հատով և մյուս տարի հասնելու է 1072-ի:

Փաշինյանը հարցրեց՝ շա՞տ է այս թիվը 2,8 մլրդ բյուջե ունեցող Հայաստանի համար, թե՞ քիչ: Նա տեղեկացրեց, որ Դանիայի խորհրդարան հարցում է ուղարկել՝ իմանալու, թե քանի ծառայողական մեքենա ունի Դանիայի խորհրդարանը: Պատասխանել են, որ Դանիայի խորհրդարանում ծառայողական մեքենա ունի միայն խորհրդարանի խոսնակը: Մինչդեռ ՀՀ ԱԺ-ում կա 82 ծառայողական ավտոմեքենա:

«Այն, որ ԱԺ նախագահը պետք է ունենա մեքենա, դա չի քննարկվում, սակայն մենք, լինելով հինավուրց ու վաստակաշատ ԱԺ, քարը գլուխը՝ խմբակցությունների ղեկավարներն էլ պետք է ունենան: Լավ, առատաձեռն ենք՝ հանձնաժողովի նախագահներն էլ թող ունենան, լավ, ԱԺ աշխատակազմն էլ ձեզ նվեր: Բա մնացածներն ովքե՞ր են, էտ ովքե՞ր են: Մոտավորապես նույն վիճակն է նաեւ կառավարության աշխատակազմում՝ ամեն երեք աշխատողի մեկ մեքենա է հասնում: «Առանց օֆ անելու ԱԺ-ն ընդունում է կառավարության շըփթըփ ընդունած որոշումները, հետո անցնում է մեկ-երկու տարի, ասում ենք՝ արա, էս ի՞նչ ենք անում՝ ունքը շտկելու տեղը աչքն ենք հանում: Նույնը եղավ նույնականացման քարտերի հետ՝ ինչքան գրանտային միջոցներ ծախսվեցին դրա համար: Ես կուզենամ մեր պաշտոնյաները ամեն առավոտ կռացած ու կարտոշկի գրուզավիկի նման տեղափոխող գազելներ նստեն ու գնան, ինչպես ստիպում են տարեցներին ու դեռատի աղջիկներին»,- ասաց Փաշինյանը:

Պատգամավորի խոսքով՝ եթե մեր պաշտոնյաներն աշխատեին Դանիայում այնպես, ինչպես այստեղ են աշխատում, ապա ոչ թե «բրանիրովոնի լիմուզիններով գործի կգնային, այլ ամեն օր պալասատովի պիժամայով՝ օրը երկու անգամ զբոսանքի»:

Փաշինյանը տեղեկացրեց, որ 1072 ծառայողական մեքենաների մեջ չեն մտնում «ախրանայի» ավտոմեքենաները, ՊՆ-ի, Ոստիկանության, ԴԱՀԿ-ի, հարկային ծառայության, ԿԲ-ի, քաղաքապետարանի, գյուղապետարանների ավտոմեքենաների թիվը:

«Եթե այս թիվն էլ գումարենք, ապա մենք ՀՀ-ում ծառայողական ավտոմեքենաների թվով գերազանցում ենք ԱՄՆ-ին, Չինաստանին, ՌԴ-ին ու Հնդկաստանին»:

Արձագանքելով Փաշինյանի դիտարկմանը՝ ԱԺ նախագահ Գալուստ Սահակյանն ասաց, որ չարագործությունը կարող է նաեւ դրական հետևանքներ ունենալ:

«ՀՀ ԱԺ-ն և՛ մեքենաների, և՛ ֆինանսական առումով Դանիայի հետ համեմատած ծիծաղելի իրավիճակի մեջ կընկնի: Դրանք անձին սպասարկող մեքենաներ չեն: Դա ուղղված է տվյալ հանձնաժողովին, ոչ թե անձին: Իսկ ինչ վերաբերում է նրան, որ եթե հանկարծ այդ մեքենաները չլինեն, մի քանի անգամ ծախսերը կշատանային, քան այս դեպքում: Իհարկե, ես էլ շատ կցանկանայի, որ այնպիսի մթնոլորտում ապրեինք, որ հեծանիվով ման գայինք, շատ կցանկանայի, որ  անվտանգության սպասարկողներ չլինեին: Ամեն մի պետություն այնպես է ապրում, որ սուղ միջոցներով առաջ գնա: Ես չեմ հասկանում ՝ այդ խանդը որտեղից է գալիս: Մեր ընդհանուր բյուջեն ընդամենը աշխատավարձ է: Ի դեպ, այդ 82 ավտոմեքենաներից 30-ը որպես լոմ կանգնած է: Յեքա գերանը չտեսար, ասեղը տեսար»,- ասաց Սահակյանը: