Լիլիթ Թադևոսյան

«Այս բյուջեի ամենավտանգավորն այն է, որ եթե բյուջեն ընդունում ենք և անցնում ու քայլեր չենք ձեռնարկելու, էլի ունենալու եք նույն խոսակցությունն, ու էլի պակասելու է»,- այսօր, երբ ԱԺ-ում քննարկվում էր 2016 թվականի բյուջեի սոցիալական ոլորտը, իր ելությում ասաց ԱԺ ՀԱԿ խմբակցության պատգամավոր, տնտեսագետ Հրանտ Բագրատյանը:

Այնուհետև նա ներկայացրեց, թե որն է խնդիրը:

«Բյուջեի նախագծում ներկայացված չի տնտեսական քաղաքականության մոդելը, դա գալիս է նրանից, որ կառվարությունում չենք քննարկել այս մոդելը: Արդյունքում այս կառավարությունը մոտավորապես արժանանալու է նույն բախտին, ինչ նախորդ կառավարությունը: Այս կառավարությանը մենք զգուշացրել ենք՝ տնտեսության աճելու համար պետք է այլ քաղաքականություն: Նախորդ կառավարությունը չէր հասկանում: Նախորդ կառավարությունը քաղաքականություն չուներ, ասում էր մակրոտնտեսական ստաբիլիզացիա: Ի՞նչ է դա, խոսքը վերաբերում է միջավայրին, ասենք բաղնիքի ջերմաստիճանը պետք է լինի 30 աստիճան, բայց բաղնիքում լողանալու համար նաև տաք ջուր է պետք: Խնդիրը տաք ջուրն է ու լողանալը: Իսկ ջերմաստիճանը այդ պայմանն է: Դուք չեք լսում, բայց այստեղ այդուհանդերձ կան մեկ-երկուսը, որ ասում են ձեզ այդ քաղաքականության մասին»,- ասաց Բագրատյանը:

Այնուհետև իր խոսքն ուղղելով ՀՀ աշխատանքի և սոցիալական հարցերի նախարար Արտեմ Ասատրյանին՝ Բագրատյանն ասաց, որ քաղաքականություն չէ՝ վեր կենալ ու ասել հաշմանդամներին այսքան սայլակ կտանք: Բագրատյանի խոսքերով՝ դա նախարարության օրական խնդիրն է, և հարց է առաջանում, թե որն է նրանց սոցիալական քաղաքականությունը, ինչպես են եկամուտները բաշխելու, որ նպաստեն տնտեսության աճին: Բագրատյանը նշեց, որ սրա մասին պետք է խոսեր Ասատրյանը, որպես քաղաքականություն տանող նախարար:

Ինչ վերաբերում է քաղաքականությանը, Բագրատյանն ասաց. «Սա հատկապես վերաբերում է հանրապետության երկրորդ և երրորդ նախագահներին: Վերականգնողական աճը սպառվել է, Հայաստանում արվել են ռեֆորմներ 90-ականներին՝ լավագույնը, ըստ Համաշխարհային բանկի գնահատման, աշխարհում, ավելի լավ քան Արևելյան Եվրոպայում, էդ միակ դեպքն է, նայեք «Կովկասյան վագրի ցատկ» 2006 թվականի գիրքը: Բայց դա ստեղծել է մթնոլորտ, դրանից հետո տնտեսությունը, որը քանդվելու էր, երկու անգամ իջել էր, սկսեց աճել, սկսեց աճել վերականգնողական ձևով: Այսօր դուք ինձ կարող եք ասել, այ Բագրատյան, ի՞նչ վերականգնողական աճ, մենք փող չունենք աշխատավարձ տանք:

Լսե՛ք, փող ունեցողը չի խնայում, սկսում են խնայել, երբ որ փող չունեն: Մենք ձեզ ասում ենք՝ դրեք 100-ից 200 միլիարդ դրամ փող, բերեք 2-3 հատ կլաստեր, ասեք՝ սա զարգացնում ենք, մասնավոր սեկտոր, արի վրան դիր փողը ավելանա, այս ճանապարհը եթե չանեք, ոչինչ չի ստացվելու: Բացատրությունում էլ կասենք՝ կամ աշխարհը նպաստեց մեր աճին կամ չնպաստեց: Մի հատ էլ հիմնադրամ դնեիք, ասեիք՝ ժողովուրդ, ձեզ հրավիրում ենք խնայողության, գիտեմ աղքատ ես, գիտեմ թոշակդ քիչ է, արի հազար դրամ ներդրի, ես քեզ 5 տոկոս եկամտաբերության երաշխիք եմ տալիս: Չէ, ձեր ներդրումներն էլ են մոնոպոլիզացվել՝ որևէ օլիգարխի անվան հետ կապված»,- ասաց Հրանտ Բագրատյանը:

Իր ելությի ավարտին Բագրատյանն առաջարկեց կառավարությանը գնալ տնտեսական քաղաքականության, սխալ կամ ճիշտ՝ միայն թե գնան դրան: