Ամստերդամի «Արտիս» թագավորական կենդանաբանական այգու ներկայացուցիչները եւ միջազգային ճանաչում ունեցող լանդշաֆտային ճարտարապետները Երեւանի քաղաքապետի առաջին տեղակալ, քաղաքապետի պաշտոնակատար Տարոն Մարգարյանին են ներկայացրել Երեւանի կենդանաբանական այգու նոր գլխավոր հատակագծի նախագիծը: 

Կարեւորելով 70-ամյա կենդանաբանական այգու դերը որպես երեւանցիների ժամանցի հաճախելի եւ սիրված վայր՝ Տարոն Մարգարյանը համոզմունք է հայտնել, որ նոր լուծումների, ենթակառուցվածքների ներդրման եւ այդչափ ինքնատիպ ձեւավորման պարագայում Երեւանի կենդանաբանական այգին կդառնա նաեւ կրթադաստիարակչական եւ բնապահպանական ակտիվ գործող կենտրոն:

«Մենք ուզում ենք բարեփոխումներ եւ աշխատանքների որակական փոփոխություններ տեսնել: Զարգացման ծրագրերին զուգահեռ նախատեսում ենք նաեւ Կենդանաբանական այգում ներդնել կառավարման նոր ձեւ, որը կնպաստի հնարավոր ներդրողների հետ ավելի արդյունավետ աշխատելուն», - հավելել է Տարոն Մարգարյանը: 

Հյուրերը շեշտել են, որ Երեւանի կենդանաբանական այգու ռելիեֆային առանձնահատկությունը եւ կենդանական ու բուսական բազմազանությունը ինքնին մեծ հնարավորություն են ծրագիրը հաջող իրականացնելու համար:

«Տարածաշրջանը կարիք ունի նման ծրագրերի իրականացման: Եթե Երեւանը գերազանցի իր «Մաստեր պլանով», ապա բավականին առավելություն կունենաք»,- նշել է Ամստերդամի «Արտիս» թագավորական կենդանաբանական այգու տնօրեն Հայկ Բալյանը՝ ներկայացված նախագիծը գնահատելով տնտեսական տեսանկյունից: Նա նշել է նաեւ, որ խումբը, որը կամավորական սկզբունքով է աշխատում Երեւանի կենդանաբանաակն այգու տնօրինության հետ, պատրաստ է աջակցել բոլոր հարցերում:

Քաղաքապետի պաշտոնակատար Տարոն Մարգարյանը առանձնահատուկ շնորհակալություն է այտնել Հայկ Բալյանին՝ Երեւանի կենդանաբանական այգուն ցուցաբերած ուշադրության եւ մեծ աջակցության համար եւ վստահություն հայտնել, որ արդյունավետ համագործակցության շնորհիվ կյանքի կկոչվի այս գեղեցիկ նախագիծը: Այս մասին հայտնում է քաղաքապետարանի տեղեկատվության եւ հասարակայնության հետ կապերի վարչությունը: