Տեսանյութեր
Լուսանկարներ
Կստեղծվի նաեւ «Պետական լոտո» ՓԲԸ` 50%-50% մասնաբաժիններով
Այսօր ֆինանսների նախարար Վաչե Գաբրիելյանը եւ «Ամայա գեյմինգ գրուպ» (AMAYA GAYMING GROUP) կանադական կորպորացիայի նախագահ եւ գործադիր տնօրեն Դեյվիդ Բաազովը ստորագրել են պայմանագիր, որով նախատեսվում է մեր երկրում ներդնել շահումով խաղերի սարքավորումների վերահսկողության միասնական համակարգ եւ կազմակերպել պետական վիճակախաղ:
Վերահսկողական համակարգի ներդրման նպատակն է ապահովել շահումով խաղերի եւ վիճակախաղերի ոլորտում սպառողների շահերի պաշտպանությունը, ունենալ հստակ հաշվետվողական համակարգ, որը հնարավորություն կտա խուսափել ՀՀ տարածքում շահագործվող շահումով խաղային էլեկտրոնային սարքավորումների միջոցով փողերի լվացումից, խարդախությունից, այլ տնտեսական հանցագործություններից եւ խաղային խաբեություններից: Շահումով խաղերի սարքավորումների վերահսկողության միասնական համակարգի ներդրման համար կորպորացիան Հայաստանին անհատույց, սեփականության իրավունքով կտրամադրի սարքավորումներ եւ տեխնոլոգիաներ:
Համակարգը համակարգչային ծրագրային ծառայությունների համակցություն է, որը հավաքագրում եւ ֆինանսների նախարարությունում գտնվող կենտրոնական սերվերին փոխանցում է տվյալ պահին բոլոր էլեկտրոնային խաղային սարքավորումներին վերաբերող տվյալներն ու գործողությունները եւ տրամադրում բոլոր անհրաժեշտ միջոցները, որոնք թույլ են տալիս հսկել ֆինանսական տվյալները եւ հայտնաբերել կեղծիքները ամբողջ ցանցով մեկ:
Երկկողմ համաձայնության արդյունքում կստեղծվի նաեւ «Պետական լոտո» փակ բաժնետիրական ընկերություն` 50%-50% մասնաբաժիններով, որն էլ «Ամայա գեյմինգ գրուպ»-ի ներդրումներով կկազմակերպի վիճակախաղ: Վիճակախաղից ստացված շահույթը հավասարապես կբաշխվի Հայաստանի Հանրապետության եւ «Ամայա գեյմինգ գրուպ»-ի միջեւ: Պետական վիճակախաղը կկազմակերպվի միջազգային պրակտիկայում ընդունված լավագույն փորձին համապատասխան: Այս մասին հայտնում են ֆինանսների նախարարության տեղեկատվության եւ հասարակայնության հետ կապերին բաժնից:
Մեկնաբանել