Էջմիածնի 19/11 տեղամասում ընտրությունները հանգիստ էին անցնում: Ինչպես այլ տեղամասերում, այստեղ էլ ակտիվություն չէր նկատվում: Հանձնաժողովի ՀԱԿ անդամը Արմինե Խուդոյանն է: Նա Վաղարշապատի ՔԿԱԳ բաժնի պետն է: Օրենքով ՔԿԱԳ մարմինների գործունեությունը կազմակերպում է այն համայնքի ղեկավարը, որտեղ գտնվում են համապատասխան կառույցները, ասել է թե Արմինե Խուդոյանն աշխատում է Էջմիածնի քաղաքապետի անմիջական «հսկողության» ներքո: Իսկ քաղաքապետը ԱԺ ՀՀԿ խմբակցության պատգամավոր Մանվել Գրիգորյանի որդին է:

Էջմիածնում որևէ մեկը Արմինե Խուդոյանին որպես ընդդիմադիր չի ճանաչում: Նա միշտ աչքի է ընկել իր իշխանական հայացքներով, իսկ աշխատանքային գործունեության մեջ երբևէ չի արել մի բան, որը դուր չէր գա Մանվել Գրիգորյանին:

Մեզ հետ զրույցում Ա. Խուդոյանը չէր ցանկանում նշել, թե որ կուսակցության կողմից է հանձնաժողովի անդամ դարձել: «Ինչ կարևոր է»,- նշում էր նա:

Արմինե Խուդոյանից հետաքրքրվեցի, թե երբվանից է ընդդիմադիր դարձել, քանի որ նրան ավելի շատ ՀՀԿ-ական են ճանաչում: «Այսպես էլ է լինում»,- հնչեց պատասխանը:

Նշենք, որ Արմինե Խուդոյանի ամուսինն էլ պատահական մարդ չէ: Նորիկ Միրզոյանը 2005թ. մինչ օրս աշխատում է Էջմիածնի քաղաքապետարանում` որպես բնակարանային կոմունալ վարչության պետ: Նա նաև Մանվել Գրիգորյանի մտերիմներից է, ինչը ևս բացառում է կնոջ՝ Արմինե Խուդոյանի ընդդիմադիր լինելը:

Ուշագրավ է, որ Արմինե Խուդոյանը իրավաբանի մասնագիտություն ստացել է հենց Մանվել Գրիգորյանի բուհում՝ «Գրիգոր Լուսավորիչ» համալսարանում:

Մնում է պարզել, թե նա ինչպես է հանրաքվեի տեղամասային հանձնաժողովի անդամ դարձել հենց ՀԱԿ-ի կողմից:

Լուսանկարում Ա. Խուդոյանը աջից առաջինը