Շենգավիթ համայնքի թիվ 134 մանկապարտեզի շենքում տեղակայված են երկու ընտրատեղամասեր:

11/16 ընտրատեղամասի հանձնաժողովի նախագահ Էմմա Դավթյանը հաղորդեց, որ քվեարկությունն անցել է առանց խախտումների:  1745 ընտրողից հանրաքվեին  մասնակցել են 905-ը:

Այստեղ դիտորդներ կային միայն ՀՀԿ կուսակցությունից, որոնց ներկայացուցիչները շրջում էին տեղամասով և ցուցումներ տալիս մարդկանց: Քանի որ իրենց գործառույթը հուշող բեյջեր չէին կրում, նրանց անձը պարզելու համար դիմեցինք հանձնաժողովի նախագահին, ով ասաց. «ՀՀԿ-ի տղաներն են, բոլորն էլ վստահված են: Երրորդ մասի տղաներին բան չես կարող ասել: Դիտորդներ ուղարկելու համար մյուս կուսակցություններին էլ եմ ասել, բայց ոչ մեկ մարդ չուներ, որ ուղարկեր»:

Շենքում գործող մյուս ընտրատեղամասի՝ 11/17-ի գրանցամատյանը նույնպես չուներ խախտումների մասին որևէ արձանագրություն: Այստեղ նույնպես դիտորդական առաքելություն էր իրականացնում միայն ՀՀԿ ներկայացուցիչը: Ըստ հանձաժողովի տվյալների՝ գրանցված 1892 անձից քվեարկության է մասնակցել 714 քաղաքացի:

Քաղաքացիների ակտիվ մասնակցության մասին ՀՀԿ դիտորդն ասաց. «Մարդիկ կարոտել են ընտրություններին, դրա համար էլ գալիս են»:

Մինչ երկու ընտրատեղամասերում էլ հանձնաժողովի նախագահները ժխտում են որևէ խախտման մասին, միջանցքում հավաքվել են մի խումբ երիտասարդներ, ովքեր միմյանց գաղտնի ինչ-որ բաներ էին փոխանցում: Լրագրողի ներկայությունը նկատելով՝ հավաքվածները շփոթվեցին ու անմիջապես միմյանց զգուշացրին այդ մասին: 

Ազատուհի Խաչատրյան