Կարինե Բայանդուրյան

Տիգրան Մեծ 39 շենքի բնակիչներն  ահազանգում են՝ հոկտեմբեր ամսին վերելակը 10 օր չի աշխատել, այդ խնդրով բազմիցս դիմել են համատիրություն, սակայն խնդիրն, այնուամենայնիվ, անուշադրության է մատնվել:

Սրան գումարած, ի տարբերություն մյուս ամիսների, երբ վերելակի ամսավճարը առավելագույնը 7000 դրամ է կազմել, հոկտեմբերին բնակիչները ստիպված են եղել 12000 դրամ վճարել՝ քսան օր վերելակից օգտվելու դիմաց:  

«Կենտրոն» համատիրության նախագահ Արա Միքայելյանը հավաստիացրեց, որ վերջին անգամ վերելակը փորձաքննություն է անցել հոկտեմբեր ամսին. «Արդյունքը՝ նորմալ»: Այս հայտարարությունը բնակիչների շրջանում ծիծաղ  առաջացրեց:

«Ոնց կարող է ստուգած լինեն, եթե ամսվա կեսը չի աշխատել, շենքում էլ ոչ մեկը տեղյակ չի, որ փորձաքննության են ենթարկել»,- տեղեկացրեց շենքի բնակչուհի տիկին Աննան:

Համատիրությունում կարծում են, որ վերելակը բնակչի սեփականությունն է: «Երևանում գրեթե բոլոր վերելակներն են 40-ն անց, քաղաքապետարանը մեզ գումար չի հատկացնում վերելակները փոխելու համար: Եթե բնակիչները ուզում են, կարող են սեփական միջոցներով փոխել վերելակը, ամենաէժանը թուրքականն է՝ 50000 դոլար»,- ասաց Արա Միքայելյանը:

Շենքի բնակիչները դիմում են գրել «Հայաստանի էլեկտրական ցանցեր» ՓԲԸ «Կենտրոն» տարածքային համակարգման տնօրինություն, խնդրելով պարզաբանել, ինչի հետ է կապված ամսավճարի կտրուկ աճը: Դիմումին ի պատասխան ստուգումներ անցկացրած էլ ցանցի մասնագետը բնակիչներին հայտարարել է, որ հաշվիչի հետ խնդիրներ չկա: Անհրաժեշտ են հավելյալ  ստուգումներ՝ պարզելու համար, որն է խնդիրը:

Հավելյալ ստուգումներ մինչ օրս չեն կատարվել, և բնակիչները ստիպված կլինեն նույնչափ վճարել նաև այս ամիս: