Ազգային ժողովի պատգամավորներ Հովհաննես Մարգարյանը և Հեղինե Բիշարյանը` օրենսդրական նախաձեռնության կարգով ԱԺ են ներկայացրել «Պե­տա­կան կենսաթոշակների մա­սին» Հայաստանի Հանրապե­տու­թյան օրեն­քում լրացում կատարելու մասին» Հա­յաս­­տանի Հանրա­պե­տու­թյան օրենք նախագիծը: Կառավարությունը դեմ է ներկայացված օրենքի նախագծին, ինչի վերաբերյալ վարչապետ Հովիկ Աբրահամյանը գրություն է ուղարկել Ազգային ժողով:

Պատգամավորները նախագծով առաջարկում էին կենսաթոշակ նշանակելիս չորս զավակ ունեցող կենսաթոշակառու մայրերի համար հաշվարկված կենսաթոշակին ավելացնել նախա­տես­ված կենսաթոշակի 20%-ը, հինգ զավակներ ունեցող մայրերինը` 40%-ը, իսկ վեց և ավելի զավակներ ունեցող մայրերին` 60%-ը: Ըստ նախագծի հեղինակների լրացված օրենքի ընդու­նու­մը լրացուցիչ խթան կհանդիսանա ծնելիության աճի համար:

Կառավարությունը մերժում է նախագիծը` նշելով. «Մեր կարծիքով, 30-40 տարի հետո կենսաթոշակին տրվող հավելման ակնկալիքը չի կարող դիտարկվել որ­պես ծնելիությունը խթանող ազդակ»:

ԱԺ նախագահ Գալուստ Սայակյանին ուղղված նամակում նշված է, որ որ ժողովրդա­գրա­կան վիճակի զարգացումը արդեն իսկ գտնվում է կառավարության մշտական ուշադրության կենտրոնում: 

Որպես ծնելիության խթան­մա­նը միտված ծրագրեր կառավարությունը հիշեցնում է երկու ծրագիր.

• Մասնավորապես, սկսած 2014 թվականի հունվարի 1-ից` 3-րդ և 4-րդ երեխայի ծննդյան դեպքում երեխայի ծննդյան միանվագ նպաստի չափը սահմանվեց 1 մլն դրամ, իսկ 5-րդ և հաջորդ երեխայի ծննդյան դեպքում՝ 1.5 մլն դրամ: Ընդ որում, 500 հազար դրամը վճարվում է առձեռն, իսկ մնացած գումարը (համապատասխանաբար` 500 հազար դրամ և 1 մլն դրամ) փոխանցվում է երեխայի անվամբ բացված պետական աջակցության հաշվին՝ որպես ընտանեկան դրամագլուխ:

• Սկսած 2016 թվականի հունվարի 1-ից` աշխատող կանանց համար Հա­­յաս­տանի Հանրապետության աշխատանքային օրենսգրքով սահմանված հղիության և ծննդա­բերության արձակուրդի իրավունք ունենալու 140-օրյա ժամանակահատվածի համար մայրության նպաստկ վճարվի նաև չաշխատող կանանց: 

Ամենատարբեր ուսումնասիրու­թյուն­նե­րը, ինչպես գրված է կառավարության հիմնավորման մեջ, ցույց են տալիս, որ դրամական վճարներն որպես գործոն ծնելիությունը խթանող առաջ­նա­յին դիրքերում չեն:  Չի մանրասմասնվում, թե ինչ ուսումնասիրությունների մասին է խոսքը:

Բացի այդ  նշվում է, որ ներկայացված նախագիծը չի բխում կենսաթոշակային ապահովության բնագա­վա­ռում վարվող քաղաքականության էությունից:

«Այսպես, վերջին տարիներին իրականացված աշ­խատանքները միտված են եղել կենսաթոշակի նկատմամբ սահմանված հավելումների ներառմանը կենսաթոշակի չափի մեջ՝ նպատակու նենալով ապահովել կենսաթոշակային ապահովության համակարգի համապատասխանությունը ձևավորված սոցիալտնտեսական իրողություններին և «կենսաթոշակ» եզրույթի բովանդակությանը:

Մասնավորապես, կենսա­թո­շակային  ապահովության համակարգը պետք է եկամտով ապահովի  լրակեցության (որո­շա­կի տարիքի հասնելու), հաշմանդամության  և  կերակրողին կորցնելու դեպքերում: Կենսա­թո­շակը նախ և առաջ անձի աշխատանքային գործունեության արդյունք է, իսկ կենսաթո­շա­կա­յին համակարգի համար լրացուցիչ գործառույթներ սահմանելը (կենսաթոշակային ապա­հո­վության համակարգի շրջանակներում այլ խնդիրների լուծմանը միտված արտոնու­թյուն­նե­րի տրամադրումը) էական բացասական ազդեցություն է ունենում համակարգի արդյունա­վե­տու­թյան և ֆինանսական հավասարակշռվածության վրա:

Ըստ այդմ, 2014 թվականի հուն­վարի 1-ից սոցիալական կենսաթոշակները վերանվանվեցին ծերության, հաշմանդամության, կերակրողին կորցնելու դեպքում նպաստներ»,- տեղեկացնում է կառավարությունը:

Հարկ է նաև նկատի ունենալ, գրված է նամակում, որ 1974 թվականի հունվարի 1-ից հետո ծնված անձի կենսաթոշակի չափը ձևավորվելու է կուտակային համակարգում, այն ինչ խնդրո առարկա փոփոխությունն անմիջականորեն ազդելու է կենսաթոշակային տարիքի և դրան մոտ անձանց վրա:

Կառավարությունը նշել նաև, որ նախագծի ընդունումը կհանգեցնի Հա­յաս­տա­նի Հանրա­պետու­թյան պետական բյուջեից լրացուցիչ հատկացումների անհրաժեշտության, որը նախատես­ված չէ ինչպես Հա­յաս­տա­նի Հանրապետության Ազգային ժողով ներկայացված Հա­յաս­տա­նի Հանրապետության 2016 թվականի պետական բյուջեի նախագծով, այնպես էլ ՀՀ 2016-2018 թվա­կանների պետական միջնաժամկետ ծախսերի ծրագրով:

Օրենքի նախագիծը Ազգային ժողովում քննարկելիս հարակից զեկուցմամբ հանդես կգա աշխատանքի և սոցիալական հարցերի նախարար Արտեմ Ասատրյանը:

Եթե նախագծի ընդունվի, դեպքում Հայաստանի Հանրապետության կառավարության 2011 թվա­կանի մայիսի 5-ի «Պետական կենuաթոշակների մաuին» Հայաuտանի Հանրա­պե­տու­թյան oրեն­­քի կիրարկումն ապահովելու մասին» N 665-Ն որոշման մեջ եռամսյա ժամ­կետում կկա­տար­վեն անհրաժեշտ փոփոխությունները: